Tiô Khu hnê mơhno kuăn ngo kong pơlê Dak Lak, lâp kong pơlê dế nôkố ai vâ chê 1 rơpâu ngế ki châ kuăn pơlê loi tơngah tung pơlê pơla mâu hdroâng kuăn ngo. Kố cho mâu ngế ki rêh ối tung mâu pơlê cheăm, hlê plĕng ‘na khôi túa, vêa vong dêi hdroâng kuăn ngo, djâ troăng ahdrối mâu tơdroăng pêi cheăng kâ, rêh ối lĕm tro, rak vế luât pơlê pơla tung rơpŏng hngêi djâ troăng lĕm, xuân pêi pro ai hên hnoăng pơlê pơla. Tung mâu hơnăm hdrối mê hiá nah, mâu ngế ki châ kuăn pơlê loi tơngah mê hiăng chiâng khu ki xiâm, cho tíu ki tơdjêp kal kân khât pơla khu kăn pơkuâ ƀă kuăn pơlê mâu hdroâng kuăn ngo, veăng kum tung mơhnhôk thế, hnê khĕn mâu kuăn pơlê hdroâng kuăn ngo tung mơjiâng cheăng Đảng, khu râ pơkuâ, khu cheăng kal kí a Dak Lak.

A roh hôp mê, mâu kăn hiăng rơtế tơpui tơno, mơhno tối mâu tơdroăng ki rơkê plĕng tung thăm mơdêk hnoăng cheăng dêi mơngế ki ai hnoăng tung rêm kơvâ cheăng mơnhông cheăng kâ-rêh ối pơlê pơla, rak vế ƀă pơtối mơnhông khôi tuá, vêa vong lĕm tro dêi kuăn ngo tơná, rak vế tơniăn cheăng kal kí ƀă rak tơdroăng rêh kâ ối tơniăn lĕm a pơlê cheăm. Drêng kố, kong pơlê Dak Lak hiăng pơ-eăng 100 ngế ki châ kuăn pơlê loi tơngah dêi hơnăm 2022.