Hâi lơ 21/2, Vi ƀan kong pơlê Dak Lak tơkŭm po ‘’Hneăng hôp mơgêi tơdroăng pêi cheăng pơ’lêh pro mơ-éa hơnăm 2022, pêi pro troăng pêi la ngiâ hnoăng cheăng hơnăm 2023’’. Klêi môi hơnăm pro kêi mâu tơmeăm tung tơdroăng pêi cheăng kố, khu râ kăn pơkuâ kong pơlê pơkâ mâu kơ koan, tíu cheăng tung kong pơlê pơtối pêi păng ‘nâng, teăm tơdrêng tơleăng tơvâ tơvâ, tô tuăn dêi kuăn pơlê ƀă rơtế khu tê mơdró.

Tiô tơbleăng tơdroăng châ tơƀrê pơ’lêh tung pro mơ-éa tơnêi têa hơnăm 2021 dêi mâu kong pơlê, pơlê kong kơdrâm ối tung Tơnêi têa xua Khu xiâm pơkuâ kăn ƀô̆ tơbleăng mê Dak Lak ối má 36/63 kong pơlê, pơlê kong kơdrâm, tâk 3,3 điêm ƀă pơ’lêh 9 râ tâng pơchông ƀă hơnăm 2020. Hơnăm 2023, Dak Lak mơ-eăm tâk 5 – 7 râ tung tơdroăng pơ’lêh pro hlá mơ-éa ƀă pơkâ pêi troh hơnăm 2025, kơlo têk chu pơ’lêh pro mơ-éa dêi kong pơlê ối tung khu 20/63 kong pơlê, pơlê kong kơdrâm.