Cheăng kâ kơxô̆ dêi Dak Lak châ pơkâ mơnhông mơdêk a péa troăng: mơjiâng mâu kơvâ cheăng kŏng ngê̆ thông tin, pơtâng tối ƀă tơdroăng cheăng măng internet; pakĭng mê, hlối djâ kŏng ngê̆ kơxô̆ troh lâp lu tung mâu kơvâ cheăng kâ ki xiâm môi tiah pêi chiâk deăng, uâ pơliê, tê mơdró, ôm hyô ƀă logistics.

Pơkâ pêi troh hơnăm 2030, cheăng kâ kơxô̆ veăng kum ing 30% GRDP tơngi klêng; 100% tơdroăng chêh 'măn tơdjuôm ƀă kơvâ cheăng châ kơxô̆, tơdjêp, tơbleăng.

Vâ pêi châ tơdroăng pơkâ kố, Dak Lak kô tơkŭm pê klêi troăng hơlâ, luât pơkâ; mơnhông tơmeăm khoăng ƀă kơmăi kơmok kơxô̆; mơdêk khu mơdró tung măng, mơngế pêi cheăng tung măng internet; tơdrêng amê thăm xúa kŏng ngê̆ tung mâu kơvâ cheăng kâ ƀă rak tơniăn, gâk kring măng.

A rôh hôp 'na cheăng kâ kơxô̆ dêi Vi ƀan hnê ngăn kong pơlê Dak Lak, hên rơkong tơpui tối tiah kố ki xiâm ôh tá xê to 'no liăn mơjiâng tơmeăm khoăng lơ mơjiâng mâu tíu pêi cheăng, mê athế pơhlêh troăng vâ mơnhông ing kơnôm a tơdroăng pêi lo tơmeăm chiâng kơnôm hên tâ a tơdroăng chêh 'măn tung kơmăi ƀă kŏng ngê̆, ing mê pro pơxúa cheăng kâ ki khât. Tơdroăng chêh 'măn tung kơmăi kŏng ngê̆ kih thuât xô̆ xuân châ pơkâ thế vâ tí tăng ngăn, séa ngăn ƀă pơkâ mâu tơdroăng pơkâ mơnhông cheăng kâ kơxô̆.

-Pôa Đỗ Hưũ Huy, Kăn xiâm hnê ngăn Vi ƀan kuăn pơlê kong pơlê Dak Lak pơkâ thế mơjiâng tơdroăng tơkêa bro ‘na cheăng kâ kơxô̆ tiô tơdroăng “6 nhên”. Rêm tơdroăng cheăng thế ‘nâi nhên môi tíu pêi cheăng pơkuâ ƀă ai tơmeăm pêi lo ki nhên.

“Pơcháu nhên ăm rêm kơvâ cheăng, rêm tơdroăng môi ƀă tơmeăm dêi kơvâ cheăng khế kố pêi ki klâi, khế kơ'nâi ki klâi. Pơkâ thế cho rêm khế athế ai 1 tơmeăm vâ ăm nhên, nhên ngế, nhên tơdroăng cheăng. Tung tơdroăng pơkâ pêi pro dêi kong pơlê hiăng pơkâ thế rêm to cheăm bêng ai môi KOL (ngế ki vâi ô eăng) vâ mơđah tơbleăng mâu tíu ôm hyô klêi mê tơmeăm, tơmeăm pêi lo OCOP dêi pơlê cheăm a troăng hyôh măng. Á pơkâ thế athế mot tung tơmeăm ki tơdâng tơ'mô châ pơchông ngăn".