Tiô mơnhên, tơdroăng pơkuâ, hnê mơhno châ pêi pro kơtăng, tơdâng tơ’mô; mâu kơ koan cheăng hbrâ ‘nâi tơdroăng, teăm tơdrêng châ hlo, tơleăng hên roh tơdroăng, veăng gum tơniăn gâk kring kal kí ƀă pro krá tơniăn tơdroăng loi tơngah dêi kuăn pơlê.

Tung hneăng cheăng, klêi kơ’nâi séa ngăn tung khu, kong pơlê châ hlo 12 roh kâ kơhveăm liăn ngân. Tơdroăng séa ngăn châ hlo 10 roh tơdroăng ki ai xôi pơhlêh kơ koan séa ngăn. Ki tơtrŏng má môi, kong pơlê Dak Lak tơkŭm séa ngăn, tơleăng mâu tơdroăng tơkêa bro hrá pêi pro, tá hâi kêi pro ton xŏn, tơ’lêi châ lo pakong, mơ’nhê tê kơtê.

‘Na kế tơmeăm khoăng tơnêi têa klêi kơ’nâi tơmot chiâng môi, lâp kong pơlê ai lối 4.000 tíu pêi cheăng; tung mê, ai vâ chê 400 tíu pêi cheăng ối rơlối mơngế pêi cheăng kal rĕng ai troăng tơleăng. Pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak pơkâ thế mâu râ pêi pro kơtăng troăng pêi “ôh tá chiâng, ôh tá khên, ôh tá vâ, ôh tá kal kâ hveăm liăn ngân’’; mơdêk tơdroăng hnê hriâm hiâm mơno tơdroăng cheăng, pêi pro kơdĭng, tơdrăng, ƀă pêi pro tơtro tơmeăm tơnêi têa ki rơlối.