Tiô tối tơbleăng ing Chi nhánh du lịch và khách sạn Biệt Điện (a pơlê kong kơdrâm Ƀuôn Ma Thuột, Dak Lak), sap ing hâi lơ 10/2, tíu pêi cheăng kố kô pơtê hlối tơdroăng ki ôm hyô kơto rui a kơpong ôm hyô Kông vế Ƀuôn Đôn a cheăm Krông Na, tơring Ƀuôn Đôn; teăng ƀă mâu kế tơmeăm ôm hyô ki nếo tiô khôi túa lĕm tro a cheăm kố tơtro ƀă mâu tơdroăng ôm hyô ki hmâ achê ƀă rui môi tiah ăm rui prôk xah hêi, hâk ro ƀă tơmối.

Tơdroăng kố cho vâ pêi pro troăng hơlâ dêi kong pơlê Dak Lak ‘na tơdroăng ki pơtê ôm hyô kơto rui tung tơdroăng cheăng ôm hyô vâ rak vế mâu khu rui hngêi dêi tơná, hơ’lêh chiâng túa ôm hyô kơto rui ki hmâ a chê,

Xuân tơdjâk troh tơdroăng kố, a tơdroăng Khu rui Ƀuôn Đôn – môi tung mâu tơdroăng cheăng ki xiâm dêi rôh po mơdĭng Kơphế Ƀuôn Ma Thuột rôh má 8, hơnăm 2023 po a khế 3 la ngiâ a Dak Lak, kô ôh tá ai xếo tơdroăng ki tơ’noăng ăm rui kơtâu, ăm rui klê têa, ăm rui kơtú ƀa long, ôh tá tơ’noăng ăm rui trut loăng ƀă mơngế. Teăng a mê kô ai mâu tơdroăng môi tiah: Rơkâu xối ivá ăm rui, ăm rui veăng ôu kâ buffet, tơ’noăng rơnuâ ăm rui, tơ’noăng ăm rui koh hmât tơmối, ăm rui xup um ƀă tơmối ƀă hên ki ê.

Pôa Vũ Minh Thoại, ngế ki pơkuâ Ƀơrô mơhno túa lĕm tro tơring Ƀuôn Đôn ăm ‘nâi:

“Tơdroăng kố xuân cho tơdroăng tơhrâ dêi Vi ƀan hnê ngăn kong pơlê ƀă Khu tơrŭm ngăn kuăn kiâ kong châu Á. Kố cho môi troăng hơlâ ƀă hiâm mơno gá tro khât. Ngin xuân tơkôm xua nôkố vâ ai mâu kuăn rui ki rêm hâi prôk lăm mê xuân cho môi tơdroăng ki kum ăm ôm hyô. Mê tung tơdroăng mê xuân ôh ti xê krê ngế ki pơkuâ rui mê tá ngin xuân rơhêng vâ tiah kố pin athế rak vế krâu, pêi pro tro tơdroăng kố.

Xuân rơhêng vâ tiah kố sap ing peăng tơmối mê troh a Ƀuôn Đôn ngăn rui xo, pôi tá kto rui xếo, vâ pin rak vế mâu kuăn rui ki u ối rế hía rế ton rế lĕm. Tơdroăng tơdjuôm mê dêi tơring xuân môi tiah cho dêi vâi krâ nhŏng o mê ai tơdroăng ki môi tuăn môi tiah mê”.

Troăng hơlâ kố dêi kơvâ cheăng ki ai tơdjâk troh ƀă khu kăn pơkuâ cheăm tơring châ mâu tơmối môi tuăn khât. Pôa Nguyễn Xuân Thủy, môi ngế tơmối a kong pơlê Vĩnh Phúc hên hdroh troh a Bản Đôn lăm ôm hyô tối tiah kố, um méa rui hiăng hmâ achê ƀă tơnêi tơníu Bản Đôn hên hơnăm hdrối ƀă châ tơmối tung tơnêi têa ƀă kong têa ê ‘nâi troh.

Laga, tiô pôa Thủy, kơto rui prôk tâ tá kơpong ôm hyô ƀă tơkâ kroăng Srêpôk hiăng ôh tá hơniâp xếo; tơdroăng hơ’lêh túa ôm hyô akố gá tơtro khât.

"Pin athế pơtê lôi túa ôm hyô kơto rui xua gá rơ-iêo khât. Hmâ 3 – 4 ngế ‘nân a rŏng rui mê prôk tâ tá môi iâ chôu mê hlo xuân ôh tá hơniâp ro klâi. Rơpŏng á hiăng troh a Siam ôm hyô. Akố, vâi bro ôm hyô ‘na rui rơkê khât. Mơngế Siam ăm rui tung môi kơpong ai kơnâng klâ kơtăn, tơkŭm ăm rui kơtú ƀa long, kơtâu marathon, bro xiêk ƀă hên ki ê gá ro khât. Mâu vâi kuăn á tâng a chê kơnâng pêi, ‘nêk rui ăm rui kâ priât gá tơniăn khât”.

Nâ Hà Nhi Phương Thảo, tơmối ôm hyô lo ing Pơlê kong kân Hồ Chí Minh troh a Bản Đôn ôm hyô tối, nôkố khu rui hngêi a Dak Lak dế rế hía rế vâ kot lôi xua ôh tá ai kuăn. Tơdroăng ki bro túa ôm hyô kơto rui kô bro ăm khu rui long rế rĕng tâ, thăm nếo chiâng tơdjâk troh hlâ tâi. Kơvâ ôm hyô kong pơlê hơ’lêh mâu tour ôm hyô tơdjâ troh rui mơni kô ro tâ.

"Tiô á tơmiât athế mơjiâng mâu tour ôm hyô ki tơdjâk troh rui mê pôi tá tơkŭm po tour kơto rui. Pơtih bro mâu tour tí tăng ‘nâi chêng rui prôk a Bản Đôn, tơkŭm po mâu tour veăng tung mâu tơdroăng xup um, hum ƀă rak ngăn ăm rui, ôh ti xê rak vế tơdroăng ki kơto rui kô tơdjâk troh ivá dêi rui, mê nếo rui kô tơ’lêi hlâ”.

Hôm ối pâ, kơtăn kố 2 hơnăm, môi ngế tơmối ôm hyô sap ing tơring Khoái Châu, kong pơlê Hưng yên mơnúa tung tour ôm hyô kơto rui a Kơpong ôm hyô Bản Đôn (tơring Ƀuôn Đôn), ôh tá mơhúa hiăng tro rui toi kơ’lĕng klêh a ‘nâi mê thâ mot pơlât tung hngêi pơkeăng. Klêi kơ’nâi ai tơdroăng kố, teăng mâ Kŏng ti Ôm hyô Ƀiệt Điện hiăng tơbleăng pơtê tơdroăng ki ôm hyô kơto rui.

Nếo a chê kố, Hô̆i đong hnê ngăn kong pơlê Dak Lak hiăng tơbleăng Pơkâ ‘na tơdroăng tŏng kum rui hngêi ai kŭn. Tiah mê, liăn kong pơlê kô kum 500 rơpâu liăn tung môi ngế ki pơkuâ rui cho rui kăn tung môi hâi ƀă 600 rơpâu liăn cho rui kơnốu tung môi hâi, tung pơla 30 hâi prế rui hngêi kố ối dêi ƀă pó. Tâng rui kăn xiu, ngế ki pơkuâ rui mê pơtối châ kum 300 rơpâu liăn tung môi hâi kum tung pơla 10 khế rui dế xiu, 600 rơpâu liăn tung môi hâi sap ing khế 11 dế xiu troh khế má tơdrốu klêi kơ’nâi rui ai kuăn.