Hâi lơ 26/2, Vi ƀan kong pơlê Dak Lak tơrŭm ƀă Vi ƀan kong pơlê Khánh Hòa tơkŭm po Hneăng hôp tơrŭm mơnhông pơla péa kong pơlê Dak Lak ƀă Khánh Hòa hneăng hơnăm 2023 – 2025, pơkâ troăng prôk troh hơnăm 2030. A hneăng hôp, khu râ kăn pơkuâ péa kong pơlê hiăng môi tuăn kĭ tơkêa mơ-éa môi tuăn tơrŭm mơnhông cheăng kâ – rêh ối pơlê pơla tung 6 kơvâ cheăng: pêi chiâk deăng; mơhnhôk mơ’no liăn cheăng, tê mơdró, mơdró môi tơdroăng; ôm hyô; troăng klông – rơxế kơtâu; khăm pơlât, hnê hriâm, hnê mơjiâng, pêi cheăng ƀă cheăng pêi; gâk kring, cheăng lêng.

Pơkâ xiâm dêi tơdroăng môi tuăn tơrŭm cheăng pơla péa kong pơlê cho tơmiât pêi mơnhông mơdêk cheăng kâ – rêh ối pơlê pơla tung mâu kơvâ cheăng, kum xúa châ tơƀrê mâu tơmeăm khoăng, ki tơ’lêi hlâu dêi péa kong pơlê, mơnhông tơmeăm ki ai hlâu, mơhnhôk khu râ pa kong ing tơdroăng thăm tơniăn troăng klông, trâm mâ mơhno khôi túa pơla péa kong pơlê, xúa châ tơƀrê tơmeăm, khôi túa lĕm dêi rêm kong pơlê; po roh tơ’lêi hlâu mơhnhôk ó rơdêi mâu khu mơ’no liăn cheăng troh ƀă péa kong pơlê.