Sap apoăng hơnăm pêi pro tiô tơdroăng hnê hriâm phôh thong 2018, Dak Lak cho môi tung mâu kong pơlê ki ai tơdjâk hên ó xua pơreăng kân COVID-19. Tâi tâng pơla mâu khế ki kố, hok tro athế hriâm ing hyôh internet. Xua ti mê, mot tung hơnăm hriâm ki pơtối, mâu hngêi trung athế ton hên khế mê nếo châ vêh pơtối hnê tŭm ăm mâu tơdroăng ki hiăng chêh tối tung kơxop hlá mơ-éa ăm vâi hdrêng. Tơdrêng amê, tơdroăng ki tơkŭm pơkâ pêi pro tơdroăng hnê hriâm xuân kal athế tơtro ƀă tơdroăng hnê hriâm phôh thong ki nếo.

Pôa Phạm Xuân Mỹ, Kăn pơkuâ ngăn hngêi trung phôh thong kuăn ngo ai tíu kâ koi ối pơtê râ má 2 tơring Krông Pač tối ăm ‘nâi:

‘’Tơdjâk troh tơdroăng cheăng mê kal athế mơjiâng ƀai mơhriâm ki vâ mơhno  tối, tơdroăng kố hgêi trung hiăng pơkâ hnê ăm mâu tôh tơpui tơno vâ môi tuăn ngăn tiô tung tơdroăng rah ƀă mâu thái cô ki hnê vâ mơnhên tối tơdroăng hriăn plĕng mâu tơdroăng ki hiăng hriâm tiô môn hriâm ki kơxop hlá mơ-éa lơ mâu hlá mơ-éa ki ê hiăng pơkâ thế kal ai’’.

Môi tung mâu tơdroăng ki pâ thế drêng pêi pro mâu tơdroăng hnê hriâm nếo mê cho tơkŭm po 3 hdroh 1 hâi maluâ ƀă râ má môi. Laga, hên mâu tơring, cheăm tung kong pơlê Dak Lak xuân ối ai hên hngêi trung ôh tá bê lâm hriâm, ôh tá tŭm kế tơmeăm hnê hriâm, tá hâi tơtro tiô tơdroăng pơkâ thế.

Cô Hoàng Thị Cúc, pơkuâ ngăn hngêi trung râ má môi Trần Quốc Toản, pơlê kân Ea Pôč, tơring Čư̆ Mgar tối ăm ‘nâi:

‘‘Tung hriâm ai tŭm kế tơmeăm vâ xúa ăm mâu thái cô, laga, a hngêi trung kố ôh tá ai. Mâu cô bu hnê tê kơtê ăm vâi i ngăn tung hlá mơ-éa, mơhno kơxop hlá mơ-éa vâ hok tro ngăn tung um mê tê. Xua mê, môi tiê̆t hriâm tiah mê ai 3 troh 4 ngế hok tro ôh tá ai mâ, ing hâi kố troh hâi ki ê xuân ôh tá bê hok tro, ing mê khoh chiâng pá khât ăm mâu vâ o, tâng troh a hâi ki hdrối vâ tơ’noăng, mê mâu cô akố hnê ôh pá teăm ôh hlối’’.

Pakĭng mê, tơdroăng ki ôh tá tŭm hok tro hriâm tung hngêi trung xuân dế ối cho kơnâng ki mơdât ƀă kơvâ hnê hriâm a kong pơlê Dak Lak. Tơdroăng hnê mâu môn ki tơdrêng mê, hơ’lêh ing tơdroăng hnê môi môn tiah hdrối nah xuân pro mâu thái cô trâm hên xahpá, maluâ cho thái cô a râ má môi.

Thái Phạm Ngọc Lĩnh, Kăn pơkuâ ngăn hngêi trung râ má 1 Ea Tu, cheăm Ea Tu, pơlê kong kơdrâm Ƀuôn Ma Thuột, kong pơlê Dak Lak tối ăm ‘nâi:

‘’Khu thái cô dêi hngêi trung ôh tá bê tŭm, xua mê, a mâu môn ôh tá ai tŭm thái cô vâ hnê. Ki má 2, mâu môn ki kal vâ hnê adrêng môi tiah môn khoa hok tư̆  nhiên mê nôkố tá hâi teăm ai thái cô ki hnê, xua mê, athế ăm 3 ngế thái cô ki tơkŭm hnê, mê cho thái cô hnê hóa học, lịch sử, sinh học, klêi mê, maluâ môn lịch sử địa lý mê nôkố tá hâi ai thái cô krê, kal athế ai 2 ngế thái cô, lơ thái cô hnê lịch sử chiâng hnê địa lý, lơ hnê địa lý hnối hnê tá lịch sử’’.

Tiô Khu ngăn ‘na hnê hriâm ƀă hnê mơjiâng tuăn ngôa rơkê dêi kong pơlê Dak Lak, dế nôkố lâp kong pơlê ôh tá bê pá 1 rơpâu 200 ngế thái cô, khu pêi cheăng tung hngêi trung; lâm ki hriâm kal athế vêh mơjiâng pro nếo vâ tơxâng ăm tơdroăng hriâm 2 hdroh 1 hâi nôkố kal ai 500 to lâm. Ing tơdroăng ki ôh tá bê kố hiăng tơdjâk hên troh tơdroăng hnê hriâm phôh thong hơnăm 2018 dêi kong pơlê.

Mâu hngêi trung athế hnê hriâm tiô tơdroăng ki ai păng ‘nâng hdrối vâ kong pơlê ai troăng hơlâ ki tăng kế tơmeăm hnê hriâm, lơ tăng mâu thái cô hnê i tŭm.