Klêi kơ’nâi 4 hơnăm pro kŏng nhân pêi cheăng mơjiâng pro mâu tơmeăm rơxế ô tô a kong pơlê Bình Dương, ngoh Nguyễn Văn Việt, ối a cheăm Ea Na, tơring Krông Ana hiăng tơmiât pơtê tơdroăng cheăng ki ton vâ lăm tăng cheăng pêi ki ê nếo, tơ’lêi hlâu tâ. Drêng tâng tối ai roh tơbleăng tơdroăng cheăng pêi châ tơkŭm po a tơring, ngoh Việt hiăng lăm troh a tíu mê vâ tí tăng hlê plĕng.

Klêi kơ’nâi châ tâng tơdroăng ki hnê mơhno ƀă tối pơtâng tơdroăng ki nếo ai ‘na tăng rah mơngế pêi cheăng a mâu kong têa Hàn Quốc, Đài Loan, Nhuk ngoh Việt vêh pro hnối nâp dêi hồ sơ lo lăm pê cheăng a kong têa Nhuk. Ngoh Việt ai tối tiah kố, ƀă hnoăng cheăng ki hiăng hmâ pêi 4 hơnăm hnoăng cheăng dêi tơná, mê ngoh kô kơhnâ khât tung tơdroăng lo lăm pêi cheăng a kong têa Nhuk ƀă ngăn kố cho roh ki tơ’lêi hlâu vâ ngoh châ mơnhông dêi tơná ƀă thăm pêi lo liăn ngân:

“Hdrối vâ troh êng tơpui ‘na tơdroăng tăng cheăng pêi a tơring Krông Ana, á xuân hiăng tí tăng hlê plĕng ‘na ki tơƀrê tung tăng rah mơngế lăm pêi cheăng. Kố châ ngăn cho tơdroăng pói rơhêng vâ mơnhông dêi hnoăng cheăng tơná ƀă ai liăn ngân vâ mơdêk tơdroăng rêh ối dêi rơpŏng hngêi. Kơnôm châ mâu vâi nâ a Tíu xiâm hnê mơhno kơ á, mê á xuân tí tăng hlê plĕng nhên tâ ‘na tơdroăng ki tăng rah kŏng ti vâ tơná á pêi cheăng. Á xuân hiăng pơkâ pêi pro tiô kơvâ cheăng ki pro mâu tơmeăm rơxế a kong têa Nhuk”.

Nếo prếo vêh a hngêi klêi kơ’nâi 2 hơnăm pro mô đô̆i, ngoh Lê Anh Nam, ối a thôn 2, cheăm Quảng Điền xuân hiăng rĕng châ lăm tăng tíu ki tối tơbleăng, hnê pơtâng ‘na tơdroăng cheăng pêi ăm dêi tơná. Klêi kơ’nâi châ hnê tối ‘na mâu troăng hơlâ ki hnê mơhno cheăng ƀă tơdroăng cheăng pêi ăm droh rơtăm ki pêi klêi dêi hnoăng cheăng pro mô đô̆i prếo vêh a pơlê cheăm, ngoh Nam hiăng lăm hriâm vê rơxế vâ ai cheăng pêi tơtro ƀă tơdroăng cheăng kâ dêi tơná:

“Dế nokố, á nếo lo ing pro mô đô̆i, hiăng prếo a pơlê, klêi kơ’nâi hlo ai tơdroăng ki kum tối tơbleăng ăm khu ki nếo klêi pro mô đô̆i vêh a pơlê mê á xuân pói rơhêng vâ tí tăng tơdroăng cheăng ăm dêi tơná tung rêh kâ ối. Ki ahdrối tâ, á lăm hriâm xo ƀâng vê rơxế ƀă kŏng ngê̆ ‘mâi rơnêu ô tô klêi mê, á nếo lo lăm pêi cheăng”.

Tiô pôa Y Thắng Ƀdap, Kăn phŏ hnê ngăn Khu pêi chiâk deăng tơring Krông Ana tối, lâp tơring dế nôkố ai dâng 58% pơ’leăng mâ mơngế tung hơnăm ki dế pêi cheăng. Vâ kum ăm mơngế pêi cheăng châ ‘nâi nhên mâu tơdroăng ki xiâm ‘na tăng rah mơngế pê cheăng, Khu ngăn ‘na kuăn pơlê pêi chiâk hiăng tơrŭm ƀă Tíu xiâm pơkuâ ngăn ‘na tơbleăng tơdroăng cheăng ‘na tăng rah mơngế pêi cheăng a tơring, ƀă mâu cheăm, ƀă hiăng ai hên ngế dế tro hơnăm pêi cheăng tá hâi ai cheăng pêi tơtro ƀă hiâm mơno tơná vâ.

Tơdroăng ki tơbleăng mâu tơdroăng cheăng pêi troh a mâu pơlê cheăm kô kum ăm mơngế pê cheăng châ rah xo xêh mâu tơdroăng cheăng ki tơtro, veăng kum pro kơdroh kơxô̆ mơngế ôh tá ai cheăng pêi, kum mơngế pê cheăng ai cheăng pêi tơniăn ƀă pêi lo liăn tơniăn klêi kơ’nâi Têt.

“Khu ngăn ‘na kuăn pơlê pêi chiâk deăng pơtối cho khu ki tối pơtâng ăm Tíu xiâm tơbleăng tơdroăng cheăng pêi, ăm mâu khu mơdró vâ ti lâi tăng ai cheăng pêi, hnối hnê mơhnhôk mâu ngế ki tro hơnăm tâng vâ tăng tơdroăng cheăng pêi kô châ ai tơdroăng cheăng ki tơtro ƀă ivá tơná, veăng kum hnê mơhno mâu túa cheăng, hnối hlê plĕng mâu troăng hơlâ dêi Tơnêi têa ƀă  tơdroăng kum mâu ngế pêi cheăng tơ’lêi hlâu tung tăng cheăng pêi ăm kong pơlê, lăm pêi a mâu tơring, lơ a mâu kong pơlê ki ê, thăm nếo lăm pêi cheăng a kong têa vâi ê tiô troăng pơkâ thế dêi tơnêi têa. Pakĭng mê, Khu ngăn ‘na kuăn pơlê pêi chiâk tơrŭm ƀă Hngêi rak liăn kum rơpŏng kơtiê vâ veăng kum ăm mung liăn ngân, vâ ing mê, vâi khoh ai xêh liăn ngân lăm pêi cheăng a kong têa vâi ê”.

Pôa Nguyễn Văn Cương, Kăn phŏ tíu xiâm tơbleăng tơdroăng cheăng pêi dêi kong pơlê Dak Lak tối ăm ‘nâi, tung hơnăm 2023, Tíu xiâm khŏm mơ-eăm tối tơbleăng tơdroăng cheăng pêi ăm dâng 10 rơpâu ngế, kơxô̆ mơngế ki lo lăm pêi cheăng ai lối 3 rơpâu ngế ƀă lăm pêi cheăng a kong têa ê dâng 1 rơpâu 500 ngế. Vâ khoh châ chiâng pêi pro mâu tơdroăng ki kố, tung hơnăm 2023 Tíu xiâm kô tơkŭm po dâng 60 roh tơpui tơno a tơring, cheăm, ƀă ai dâng 10 roh tối tơbleăng tơdroăng cheăng pêi a Tíu xiâm.

Pakĭng mê, kô tơrŭm ƀă Khu ngăn ‘na hnê hriâm ƀă hnê mơjiang tuăn ngôa rơkê hnê mơhno tối tăng cheăng pêi ăm hok tro lâm 12. Mâu roh ki tối tơbleăng tơdroăng cheăng pêi mê kô kum pro tơ’lêi hlâu ăm mâu ngế pêi cheăng:

“Apoăng hơnăm 2023 khu mơdró kâ dế tăng rah a Tíu xiâm tơbleăng cheăng pêi hên ‘nâng, vâ tŏng kum tơ’lêi hlâu ăm khu mơdró kâ châ rah xo mơngế pêi cheăng mê Tíu xiâm kố hiăng mơdêk pêi pro hên túa cheăng ‘na tơbleăng mâu tơdroăng cheăng pêi, maluâ hơ’lêh túa tối tơbleăng, thăm nếo, Tíu xiâm kố hiăng chu troh a thôn pơlê, trâm mâ a kơmăng, hâi tơdrốu, lơ hâi tĭng tiô kơ tơdroăng ki pói vâ dêi pơlê cheăm, ki rơhêng vâ tối, tung hơnăm 2023 kố, Tíu xiâm thăm mơdêk hên tâ tung tối tơbleăng a Leh mơdĭng dêi mâu tơring, cheăm vâ hnê mơhno tối ăm vâi krâ-nhŏng o hlê plĕng nhên mâu tơdroăng cheăng pêi mê, ví ing mâu tơdroăng ki tro pơlông, pơloăng tung tăng cheăng pêi”.

Xuân tiô pôa Nguyễn Văn Cường, kong pơlê Dak Lak dế nôkố ai dâng 600 khu mơdró a kong pơlê dế kal vâ tăng mơngế pêi cheăng, hên khu mơdró kâ ing kong pơlê ki ê xuân dế tí tăng êng Tíu xiâm tơbleăng tơdroăng cheăng kong pơlê Dak Lak vâ chêh dêi inâi pâ tăng tơdroăng cheăng pêi troh a mâu kong pơlê ki ê. Tíu ki kố tăng rah ki vâ iâ hlái ai 200 ngế ƀă hên má môi ai 5 rơpâu ngế. Kố cho roh ki tơ’lêi hlâu má môi a mơngế pêi cheăng a kong pơlê Dak Lak tí tăng xêh tơdroăng cheăng pêi dêi tơná i tơniăn.