Vâ rak vế tơniăn krúa kế kâ tung rôh Têt Trung thu hơnăm kố, Vi ƀan hnê ngăn kong pơlê Dak Lak hiăng pơkâ mơjiâng 2 khu ki lăm séa ngăn ki ai tơdjâk troh ‘na tơniăn krúa kế kâ tung rôh Têt Trung thu hơnăm 2024 a pơlê kong kơdrâm Ƀuôn Ma Thuột, pơlê kong krâm Ƀuôn Hồ, mâu tơring Krông Pač, Ea Kar, Čư̆ Kuiñ ƀă Lak.

Tung pơla lăm ngăn ing hâi lơ 11 troh hâi lơ 13/9. Tung pơla pêi cheăng, 2 khu ki kố kô séa ngăn tơdroăng ki pêi pro mâu tơdroăng pơkâ dêi luât ‘na tơniăn krúa lĕm kế kâ dêi mâu tíu ki mơjiâng pro, tê mơdró kế kâ a kong pơlê, mâu kế tơmeăm ki mê vâ séa ngăn ki dâi lĕm. Tung pơla séa ngăn, Khu kố hlối tơrŭm tối tơbleăng, hnê mơhno mâu tơdroăng pơkâ dêi luât, mâu túa ki rơkê plĕng ‘na rak vế tơniăn kế kâ ăm ngế ki mơjiâng pro, uâ pơliê, tê mơdró, xúa kế kâ.