Tiô Tíu xiâm pơtâng tối hyôh kong prâi Tơnêi têa, tung mâu hâi hiăng hluâ, tung kong pơlê Dak Lak ai mêi krâ kơvâ, ai tíu ‘na kong mêi kân, ki kơchoh tơnêi hiăng tơniăn, kô ai têa lân lu a mâu têa kroăng, têa plông iâ ƀă tơnêi tơhnah tơhnâp a mâu a tíu rơnâk ngo a 11 tơring dêi kong pơlê.

Tung hlá mơ-éa tơbleăng, Khu pơkuâ ‘na Chiâk deăng ƀă Mơnhông thôn pơlê Dak Lak pơkâ thế Vi ƀan mâu tơring, pơlê kong krâm, pơlê kong kơdrâm ngăn đi đo tơdroăng pơtâng tối hyôh kong prâi, tơbleăng tối kong mêi kân, têa kân lân lu, têa rơlêa, tơnêi tơhnah tơhnâp, tối tơbleăng teăm tơdrêng, tŭm troh mâu khu râ kăn pơkuâ, kuăn pơlê châ ‘nâi vâ hbrâ ví, kơdroh tro lŭp. Mâu tơring kơpong tơbleăng kong prâi pro ôh tá tơniăn, môi tiah: tơring Lăk, Krông Ana, Krông Bông, Ea Súp, kal pơtroh khu lăm séa ngăn mâu kơpong kuăn pơlê rêh ối kĭng têa kroăng, têa plông, kơpong ki thông, ai tơ’lêi tro lân lu, têa rơlêa, tơnêi tơhnah tơhnâp vâ hbrâ kui tah trâp troăng thông vâ ăm têa hiu tơniăn lĕm; tơkŭm po xĕn kuăn pơlê, xĕn kuăn pơlê a kơpong rơ-iô troh tíu tơniăn.