Sap ing tơdế khế 11 hơnăm kố, Khu hnê mơhno ti tăng, tơkŭm ƀă mơnhên inâi kơxêng kiâ mô đô̆i (tối cho Khu hnê mơhno 515) kong pơlê Dak Lak hiăng tơkŭm pro leh lo lăm tí tăng chiâ xo kơxêng kiâ mô đô̆i, djâ vêh kơxêng kiâ mô đô̆i Khu lêng pleăng hnoăng cheăng ƀă Mơngế ki rơkê Việt Nam  hlâ tung mâu rơxông tơplâ xâ a kong têa Kul tung rơnó khăng khoăng 2022 – 2023.

A kong têa Kul, Khu hnê mơhno 515 kong pơlê Dak Lak hiăng pêi pro mâu tơdroăng trâm mâ, pơtâng tối, mơhnhôk khu râ kăn pơkuâ ƀă kuăn pơlê kong têa pú hmâ tơmâng, pro tơ’lêi hlâu tŏng kum kăn ƀô̆, mô đô̆i Khu K51 tung tơdroăng pêi pro hnoăng cheăng.

Tơdrêng amê, ai mâu tơdroăng tŏng kum kuăn pơlê; tối tŭm mâu troăng tŏng kum tiô troăng hơlâ dêi tơnêi têa Việt Nam ƀă mâu ngế tối tơbleăng tro tơnâp kiâ mô đô̆i Việt Nam. Tung tơdroăng pêi hnoăng cheăng, mâu kăn ƀô̆ mô đô̆i Khu K51 xuân pêi pro ƀă pêi kơtăng tiô luât Tơnêi têa Kul, nhuô̆m khôi túa lĕm tro dêi kong pơlê kong têa pú hmâ.