Hơnăm hriâm kố hngêi trung râ má péa Võ Thị Sáu a cheăm Krông Na, tơring Ƀuôn Đôn ai 349 ngế hok tro, tung mê ai 80% ngế o cho hdroâng kuăn ngo. Xua tơdroăng cheăng kâ xơpá, hên nôu pâ hiăng thế dêi kuăn pơtê hriâm ối a hngêi lăm a chiâk kum dêi rơpŏng. O Y Jun Su Ƀyă, hok tro lâm 9B, Hngêi trung râ má péa Võ Thị Sáu, tơring Ƀuôn Đôn, kong pơlê Dak Lak ăm ‘nâi:

“Tơdroăng cheăng kâ rơpŏng hngêi xơpá mê á athế pơtê hriâm đi đo vâ lăm pêi cheăng. Klêi kơ’nâi châ thái cô mơhnhôk á kô mơ-eăm hriâm tŭm hâi ôh tá pơtê xếo”.

Xuân môi tiah mê há, a Hngêi trung râ má môi Y Jut, cheăm Krông Na, tơring Ƀuôn Đôn, vâ rak vế kơxô̆ hok tro troh a lâm hriâm cho tơdroăng ki ôh tá tơ’lêi hlâu klâi.

Thái Nguyễn Tiến Chung, thái hnê Hngêi trung râ má môi Y Jút, ăm ‘nâi, tơdroăng ki mơhnhôk hok tro troh a lâm hriâm cho môi tung mâu hnoăng cheăng ki kal rơtế ƀă tơdroăng ki hnê. Drêng ai hok tro lôi hriâm, thái cô ki pơkuâ lâm tơrŭm ƀă khu pơkuâ hngêi trung troh trâm nôu pâ ƀă hok tro vâ ‘nâi nhên tơdroăng ki tơchĕng tơmiât, tơdroăng ki rơhêng vâ ƀă mơhnhôk mâu vâi o vêh hngêi trung hriâm:

“Ing hnoăng cheăng hnê tối mê apoăng mâu vâi o vêh hriâm nếo, la iâ khế mê ah ai mâu rôh vâi ôh tá ai mâ tung lâm hriâm mê ngin lăm troh a hngêi vâ mơhnhôk vâi vêh hriâm nếo. Khế ki lâi mâu vâi o pơtê hên mê athế lăm troh mơhnhôk”.

Tiô cô Trần Thị Hằng, kăn phŏ pơkuâ hngêi trung râ má môi Y Jút, cheăm Krông Na, tơring Ƀuôn Đôn, tơdroăng cheăng kố xơpá má môi ôh ti xê hnê mê cho rak vế kơxô̆ hok tro hriâm a lâm. Hâi tiah hmâ hiăng xơpá, troh khế 11 khế 12 ối xơpá tâ drêng rơnó krí kơphế, mâu vâi o pơtê hriâm tiô nôu pâ krí kơphế vâi. Mâu thái cô athế tăng kơ-êng, kong măng xuân lăm troh a chiâk vâ tăng hok tro.

“Mơhnhôk hok tro cho athế lăm troh a hngêi a kong măng, dâng 7 chôu 30 phut troh 8 chôu kong măng mê nếo châ trâm rơpŏng nôu pâ vâi. Kuăn ‘nĕng ai drêng ‘nâ ối dêi ƀă nôu pâ a chiâk hlối mê ngin xuân athế lăm troh a chiâk. Kăn pơkuâ hngêi trung, kăn phŏ pơkuâ hngêi trung, kăn hnê ngăn công đoàn, thái cô pơkuâ lâm athế rơtế mot tung chiâk va mơhnhôk hok tro vêh hriâm”.

Tơbrêi tơbrêh gá tiah mê, la drêng mâu vâi o vêh troh a lâm hriâm, mâu thái cô hlo phiu ro khât. Xua mâu thái cô ‘nâi a mâu kơpong tơnêi kơtiê xơpá môi tiah a kơpong tơkăng kong Ƀuôn Đôn, rơhêng vâ mơ-eăm hluăn ing kơtiê ôh tá ai troăng prôk ki lâi ki ê cho hriâm tâp, ai tơdroăng ki rơkê plĕng kô mơdêk tơdroăng ki hơ’lêh rơkê, hơ’lêh tơdroăng rêh ối.

Cô hnê chư Phạm Thị Loan, kăn phŏ pơkuâ hngêi trung râ má péa Võ Thị Sáu, cheăm Krông Na, tơring Ƀuôn Đôn tối:

“Tơdroăng cheăng kâ a pơlê cheăm ngin, cheăm ngin pêi cheăng kâ xơpá khât, tơnêi tơníu ôh tá hơpok lĕm ki hên cho pêt kế tơmeăm a rơnó mêi la ki chiâng há lơ ôh cho tơkôm ngăn a hyôh kong prâi. Môi tiah kố mâu vâi muăn athế ‘nâi chư mê xo ah hmôi nếo kâi kum ăm vâ vâi muăn ai xêh tơdroăng cheăng chía niân tâ”.

Rơtế ƀă tơdroăng ki mơhnhôk hok tro troh hngêi trung, mâu hngêi trung a cheăm kơpong tơkăng kong Krông Na, tơring Ƀuôn Đôn hiăng mơhnhôk hên mâu kơxô̆ liăn tơlo sap ing pơlê pơla vâ tŏng kum hok tro kơtiê ‘na hlá mơ-éa chêh, kế tơmeăm xúa tung hriâm tâp, rơxế kơto lăm hriâm ƀă hên ki ê. Kơnôm ing tơdroăng mơhnhôk ‘na liăn ngân ƀă hiâm mơno, hên hok tro a kơpong tơkăng kong châ pơtối troh hngêi trung hriâm.