Hneăng hôp cho tơdroăng ki tối rơdêi ki kal tung mơđah tơbleăng kơvâ kơphế Việt Nam tối tơdjuôm ƀă kơphế Ƀuôn Ma Thuột tối krê to a râ a’ngêi nếo, xông troh tíu xah tơdjuôm dêi kơvâ kơphế lâp plâi tơnêi. Lối 400 kăn teăng mâ ing mâu Khu xiâm pơkuâ kơmăi kơmok tê mơdró; Khu tơrŭm pêi kơphế ca cao Việt Nam, mâu khu xiâm, kơvâ cheăng tơnêi têa; teăng mâ khu râ kăn pơkuâ mâu kong pơlê, pơlê kong kơdrâm; mâu kăn teăng mâ mâu kong têa, khu tơrŭm cheăng lâp plâi tơnêi ƀă mâu khu tê mơdró pêt mơjiâng, uâ mơdiê kơphế veăng Hneăng hôp.

Xông tơpui pơxiâm po Hneăng hôp, pôa Nguyễn Tuấn Hà – Kăn phŏ hnê mơhno Vi ƀan kong pơlê Dak Lak tối ăm ‘nâi, nôkố kơphế dêi kong pơlê hiăng tê ngi kong têa ê châ lối 70 kong têa ƀă kơpong tơnêi tơníu lâp plâi tơnêi, ƀă hiăng châ Khu xiâm pơkuâ Khoa hok ƀă Kŏng ngê̆ pro ăm mơ-éa mơnhên tíu pêi kơphế Ƀuôn Ma Thuột ƀă châ tŏng kum a 32 kong têa, kơpong tơnêi tơníu lâp plâi tơnêi.

Hneăng hôp tơdjêp tê mơdró lâp plâi tơnêi roh apoăng châ tơkŭm po tung tơdroăng Leh tơbleăng kơphế Ƀuôn Ma Thuột, thăm mơnhên tơdroăng khŏm mơ-eăm dêi Dak Lak cho djâ kơphế Ƀuôn Ma Thuột chiâng tíu troh dêi kơphế lâp plâi tơnêi. 10 mơ-éa chôu vế môi tuăn tơrŭm cheăng pơla mâu khu tê mơdró tung tơnêi têa ƀă kong têa ê tung kơvâ djâ kơphế hiăng châ kĭ tơkêa a Hneăng hôp pơtối po roh tơ’lêi hlâu tê mơdró ăm kơvâ kơphế, kum mơnhên ki kơnâ kơphế, tơmeăm pêi lo ing chiâk deăng Việt Nam  hiăng ƀă dế xông hơngế, châ achê troh mâu kơpong tơnêi nếo.