Mô đô̆i gâk tơkăng kong kong pơlê Dak Lak nếo tơkŭm po ‘’Hâi leh gâk tơkăng kong tâi tâng kuăn pơlê’’ a cheăm tơkăng kong Ia Lốp, tơring Ea Súp. Cheăm tơkăng kong Ia Lốp châ mơjiâng hơnăm 2006 tiô troăng hơlâ xĕn kuăn pơlê mơnhông mơdêk cheăng kâ nếo dêi Ƀinh đoân 16 – Khu xiâm pơkuâ lêng kố cho Khu cheăng kâ cheăng lêng 737, Kuân khu 5; pơ’leăng mâ kuăn pơlê nôkố dêi cheăm dâng 6.600 ngế, ƀă 15 hdroâng mơngế rơtế rêh ối.

Tung mâu hơnăm hiăng hluâ, cheăm Ia Lốp hiăng tơrŭm krá tơniăn ƀă mâu kơ koan, kơvâ cheăng rêm râ, mâu khu pêi hnoăng cheăng tung pơlê kong kơdrâm, ki rơhêng vâ tối Đông mô đô̆i gâk tơkăng kong 735, Khu cheăng kâ cheăng lêng 737 ƀă Kŏng an tơring Ea Súp pêi tơtro tơdroăng gâk kring tơniăn, tơdroăng tâi tâng kuăn pơlê veăng gâk kring hnoăng pơkuâ tơnêi tơníu, gâk kring tơkăng kong.

Tung tơdroăng ‘’ hâi leh gâk kring tâi tâng kuăn pơlê’’, a cheăm Ia Lốp hiăng tơkŭm po hên tơdroăng pêi cheăng ki kơnía môi tiah: tơkŭm po khăm pơlât, xing xoăng pơkeăng tê kơtê, rak ngăn ivá ăm lối 500 ngế kuăn pơlê; diâp 1 toăng hngêi ‘’hngêi hơtô tơkăng kong’’; diâp 10 toăng rơxế mái ăm mâu muăn hok tro ai tơdroăng rêh ối pá puât; vâ chê 30 kơxuô tơmeăm ăm kăn pơkuâ hnê cheăng Đảng, kăn pơkuâ khu pơkuâ xêh, mâu ngế kuăn pơlê loi tơngah, rơkê tung tơdroăng tâi tâng kuăn pơlê veăng gâk kring hnoăng pơkuâ tơnêi tơníu, gâk kring tơkăng kong tơnêi têa.