Tung péa hâi lơ 1 troh lơ 2/12, Khu kăn pơkuâ hnê ngăn Đảng kong pơlê  Dak Lak tơkŭm Hôp to Khu kăn Đảng ƀô̆ kong pơlê rôh má 16 (po rơdâ) ăm veăng hnê tối mâu tơdroăng cheăng pêi tung hơnăm 2022, troăng rơhlâ tơdroăng cheăng pêi hơnăm 2023; tơdroăng séa ngăn, tí tăng ngăn ƀă hnê hnôi khĕn mâu ngế ki pro xôi luât tung Đảng; pơkâ kong pơlê Dak Lak pơla hơnăm 2021-2030, hvái ngăn troh hơnăm 2050 ƀă ‘mâi hơ’lêh, tơ’nôm Pơkâ luât pêi cheăng dêi khu kăn Đảng ƀô̆ kong pơlê hneăng 17 pơla hơnăm 2020-2025.

Tối tơbleăng a hneăng hôp, pôa Nguyễn Đình Trung, ngế cheăng tung tíu xiâm Đảng, Kăn pơkuâ hnê ngăn Đảng kong pơlê Dak Lak pơkâ thế, mâu râ  ủy Đảng tíu pêi cheăng, tơring cheăm tối tơdrăng tơdroăng mâ hlo  tơdroăng pêi pro ôh tá tro ki hâi pêi pro vâ tăng troăng tơkâ luâ.

Pakĭng mê, hbrâ ƀă pêi tro nhên tiô tơdroăng cheăng ki kal, tơkŭm pêi Pơkâ 23 dêi khu xiâm kal kí ‘na troăng rơhlâ mơnhông cheăng kâ rêh ối kơpong Tây Nguyên, Pơkâ mơnúa mơjiâng pro luât ki xiâm ăm pơlê kong kơdrâm Ƀuôn Ma Thuột, tơbleăng mâu tơdroăng tơkêa bro ki kal dêi kong pơlê, pêi pro mâu kăn cheăng kơxô̆, kơphô̆ rơkê plĕng; tơkâ luâ mâu tơdroăng pá puih, pơtê pơtân liăn ‘no mơjiâng tơmeăm khoăng tơnêi têa.