Hâi lơ 19/5/2024 cho môi hâi tơxâng hâk ƀă Y Jer Kpor, hok tro lâm 12, hngêi trung râ má pái phôh thong Nguyễn Bỉnh Khiêm, tơring Krông Pač, kong pơlê Dak Lak drêng châ tơhrâ a ngiâ hlá cờ Đảng. Y Jer Kpor ăm ‘nâi, tung pơla tí tăng ‘nâi plĕng ‘na tơdroăng xiâm rêi Đảng, ‘na mâu ngế đảng viên kăch măng khên tơnôu ƀă hiăng châ mot Đảng, Y Jer thăm rế hâk tơngăm, mơ-eăm hriâm pât tơná tâ nếo, vâ chiâng mơngế kuăn pơlê ki lĕm, đảng viên djâ troăng lĕm vâ gum pơxúa ăm kuăn pơlê:

“Apoăng pin ối nếo, cho môi ngế đảng viên nếo, mê rôh apoăng thế ‘mâi rơnêu tơná vâ chiâng môi ngế đảng viên ki lĕm tro tâ, vâ xo ah hmôi pin hiăng ai tuăn plĕng tâ vêh a pơlê tơná, pin châ gum veăng mơnhông cheăng kâ, mơnhông túa lĕm tro ƀă tah mâu tơdroăng ki ‘mêi, ki ôh tá tro ki tơdjâk troh pơlê tơná’’.

Xuân hâk tơngăm tơná châ mot tung Đảng klăng rôh tơbâ 134 hơnăm Hâi kot mâ Hồ Chí Minh, Kăn xiâm pơkuâ hnê ngăn Tơnêi têa hneăng apoăng, drêng nếo châ plah mot hriâm hngêi Đại học Kinh tế Hồ Chí Minh, Trần Phan Tường Vy ôh tá kơtôa klâi tơdroăng ki tơná tâ hâk phiu ro. Tường Vy tối, tơdroăng châ mot Đảng gum á ai tơ’nôm ivá mơ-eăm vâ pơtối mơ-eăm tâ nếo, hriâm tung pơla mâu hơnăm hriâm Đại học la ngiâ.

“Châ mot tung Đảng Kŏng san Việt Nam mê á hlo tơná á ‘nâi nhên hnoăng pêi pro dêi tơná, cho môi ngế đảng viên athế mơ-eăm khât vâ mơ-eăm rêm hâi, vâ pêi rơnêu pât tơná  tâ, vâ pêi cheăng ăm tơnêi têa’’.

Tiô cô Nguyễn Thị Mai Phượng - Kăn phó hnê ngăn Chi ƀô̆, Phŏ pơkuâ hngêi trung râ má pái phôh thong Nguyễn Bỉnh Khiêm, tơring Krông Pač, kong pơlê Dak Lak tối, tung mâu hơnăm achê kố, tơdroăng cheăng tơ’mot mâu ngế mot đảng ƀă mâu hok tro châ hngêi trung tơmâng khât tơƀrê hên. Hơnăm 2020 troh nôkố, hngêi trung hiăng ’mot Đảng ăm 19 ngế hok tro ki hriâm rơkê kơhnâ pêi pro tơdroăng lĕm, mơ-eăm tung hriâm:

“Sap hơnăm 2019 Khu tơrŭm cheăng Đảng tơring hnê mơhno ‘na tơdroăng tơ’mot mâu ngế mot đảng viên tung mâu hok tro mê chi ƀô̆ ngin tơmâng khât ‘na tơdroăng mê ƀă ngin pơkâ tơdroăng môi ngế hok tro thế châ tơbleăng inâi ăm lăm hriâm vâ chiâng ngế đảng viên mê cho tơdroăng ki apoăng rah mâu vâi o ki hriâm rơkê, hạnh kiểm lĕm. Ngin ai mâu ngế ki tiah mê klêi mê pơcháu ăm peăng khu pơkuâ ngăn Đoân  hngêi trung pơtối ăm lăm hriâm ƀă mâu vâi o ki veăng ‘na tơdroăng mê vâ tăng ngăn châ ‘nâi ai hên ngế ki ê nếo’’.

Hnăm hriâm 2020-2025 khu ngăn Đảng tơring Krông Pač mơ-eăm kô tơ’mot châ 100 ngế đảng viên tung mâu hngêi trung râ má pái phôh thong ƀă Hngêi trung hnê cheăng pêi, Hngêi trung yăo yuk thương xuên. Riân troh khế 6 hơnăm 2024. Khu pơkuâ hnê ngăn Đảng tơring Krông Pač hiăng tơ’mot châ 83 ngế đảng viên nếo cho mâu ngế kơhnâ mơ-eăm tung tơdroăng hriâm a mâu hngêi trung râ má pái phôh thong tung lâp tơring. Tung mê, hơnăm 2023 tơ’mot châ 25 ngế hok tro; 6  khế apoăng hơnăm 2024 ai 29 ngế hok tro châ mot Đảng.

Pôa Trần Hồng Tiến - Kăn hnê ngăn Đảng tơring Krông Pač, kong pơlê Dak Lak ăm ‘nâi, tơdroăng tăng tơ’mot mâu ngế mot đảng viên tung mâu hngêi trung vâ gum ăm mâu vâi o pơhlêh tuăn tơmiêt rĕng châ mot đảng viên a tơring. Drêng lăm tơkŭm hôp a mâu khu tơrŭm cheăng Đảng a cheăm bêng mâu vâi o châ mâu râ kăn a cheăm bêng pơtối chông djâ, hnê mơhno, ăm hriâm tơ’nôm vâ chiâng mơngế ki rơkê ai pơxúa:

“Tơ’mot hên mơngế mot Đảng akố ôh tá xê to vâ mơnhông tơƀrê chi ƀô̆, ăm Đảng ƀô̆ dêi tơring mê ối mơnhông ăm khu tơrŭm cheăng  Đảng. Tăng ăm Khu tơrŭm cheăng Đảng mâu đảng viên ki rơkê kơhnâ má  môi. Nôkố, tâng pin châ rah xo cho mâu vâi o đoân viên kơhnâ rơkê, hriâm rơkê a mâu hngêi trung vâ ăm mot Đảng, xo ah hmôi kô tơbleăng ăm mâu vâi o mot a mâu hngêi trung Đại học vâ pơtối veăng kum, kơjo kum mê ai mâu vâi o sinh viên cho đảng viên. Ƀă klêi hiăng lo ing hngêi trung mot cheăng a mâu kơ koan tơnêi têa mê pin kô hiăng ai mâu đảng viên ki rơkê môi tiah mê’’.

Tơdroăng tơkŭm ’mot đảng viên tung hngêi trung râ má pái phôh thông a tơring Krông Pač, kong pơlê Dak Lak hlối ai pơxúa vâ châ ’nâi, ki mơ-eăm dêi hok tro hriâm kơhnâ rơkê, hlối vâ pro ăm rế ai hên ngế châ mot Đảng tung khu hơnăm ối nếo, veăng mơnhông tơƀrê mâu đảng viên ƀă rế ai hên ngế pêi cheăng rế tơƀrê tung Đảng.