A roh trâm mâ, 138 ngế kăn teăng mâ ki má môi ăm khu ngế rơkê, ngế cheăng khoa hok, văn ngê̆ sih hiăng rơtế hvái ngăn tơdroăng pêi cheăng châ tơƀrê, veăng kum dêi mâu kơvâ cheăng tung hơnăm hiăng hluâ. Ing mê pơkâ, pâ thế mâu tơdroăng xiâm tung tơdroăng pêi cheăng khoa hok kŏng ngê̆, văn ngê̆ mâu hơnăm pơtối.

Xông tơpui a roh trâm mâ, khu râ kăn pơkuâ kong pơlê Dak Lak tối ăm ‘nâi: hơnăm 2022, tơdroăng cheăng kâ – rêh ối pơlê pơla dêi kong pơlê hiăng ai mâu tơdroăng châ tơƀrê hên. Tâi tâng mâu pơkâ tiô pơkâ hiăng mơ’no ki xiâm châ tơƀrê. Tơdroăng hnê hriâm, hnê mơjiâng, khôi túa lĕm tro, khăm pơlât, tŏng kum rêh ối pơlê pơla pơtối châ tơniăn, cheăng lêng, gâk kring, tơniăn lâp pơlê pơla châ rak.

Châ tơƀrê kố, ai tơdroăng veăng kum kân dêi khu mơngế ki rơkê mâu ngế cheăng khoa hok, văn ngê̆ sih. Hơnăm 2023, khu râ kăn pơkuâ kong pơlê Dak Lak pói vâ khu mơngế rơkê, mâu ngế cheăng khoa hok, mâu ngế văn ngê̆ sih ƀă tuăn ngôa rơkê dêi tơná pơtối veăng kum hên tâ nếo ăm kong pơlê. Tung mê, tơkŭm pêi pro châ tơƀrê mâu tơdroăng, đê tai khoa hok kŏng ngê̆, troăng tơmiât pêi rơkê ngê̆ thuât mơjiâng xiâm kối mơnhông mơdêk cheăng kâ – rêh ối pơlê pơla dêi kong pơlê.