Vi ƀan hnê ngăn kong pơlê Dak Nông nếo hnê mơhno mâu kơvâ cheăng ki ai tơdjâk troh lăm séa ngăn, mơjiâng khu ki lăm séa ngăn vâ pơkâ tơleăng tơdroăng ki tơhnah tơhnâp a têa Krông Nô. Pôa Lê Trọng Yên, kăn phŏ hnê ngăn Vi ƀan kong pơlê Dak Nông ăm ‘nâi, kong pơlê hiăng ‘nâi nhên tơdroăng ki tơhnah tơhnâp a Krông Nô tíu ki tơkâ luâ cheăm Quảng Phú, tơring Krông Nô.

Ing mê, Vi ƀan hnê ngăn kong pơlê hiăng hnê mơhno mâu kơvâ cheăng ki ai tơdjâk troh ƀă khu kăn pơkuâ tơring Krông Nô mơjiâng khu ki lăm séa ngăn tơhnah tơhnâp ƀă tối tơbleăng. Pôa Lê Trọng Yên tối nhên, tâng ăm ai tơdroăng ki tơhnâp a mâu tíu ki ki ăm phêp khu mơdró kâ, kong pơlê kô pơklât thế pơtê tơdroăng ki hrik xo prêi.

Pakĭng mê, kong pơlê Dak Nông xuân dế hnê mơhno pêi pro nhên tơdroăng ki khu mơdró kâ hrik xo prêi roê tơnêi pêi chiâk dêi kuăn pơlê a kơpong ki tơhnah tơhnâp. Tơnêi pêi chiâk deăng a kĭng têa kroăng ki hên cho vâ hrik xo prêi, tâng khu mơdró kâ pơxúa ăm dêi tơná roê tơnêi vâ tơ’lêi hlâu tung hrik xo prêi ôh tá tro luât, kong pơlê kô hnê mơhno mâu kơvâ cheăng pơkâ tơleăng kơtăng.