Klêi kơ’nâi 7 hơnăm, hiăng ai dâng 310 ha tơnêi a Dak Nông hiăng chiâ xo tâi bauxite, kong pơlê dế pơkâ mâu Khu xiâm, kơvâ cheăng rĕng ai troăng vêh mơdrếo ăm kong pơlê. Tiô tơbleăng dêi Vi ƀan kong pơlê Dak Nông, Grup pơkuâ kơmăi kơmok chiâ xo kơchâ – Tơmeăm khoăng tung kơdâm tơnêi Việt Nam châ Khu xiâm pơkuâ kế tơmeăm khoăng ƀă Kong prâi pro ăm mơ-éa phêp chiâ xo tơmeăm a tíu chiâ xo bauxite Nhân Cơ, tơring Dak Rlâp ƀă ƀăng deăng 3.074 ha, hâi khế chiâ xo tơmeăm tung kơdâm tơnêi 30 hơnăm.

Troh nôkố, TKV hiăng chiâ xo tâi kơxô̆ bauxite ƀă ƀăng deăng dâng 310 ha. Ƀăng kố châ gu tơbăng, pêt loăng nhĕn vâ rak tơniăn lĕm kong prâi. Tiô tơbleăng mơnhên tơdjâk kong prâi châ kĭ, ƀăng deăng kố klêi kơ’nâi tâi mơ-éa phêp chiâ xo nếo vêh mơdrếo ăm kong pơlê. Tiô Viƀan kong pơlê, ƀă ƀăng deăng chiâng xo hiăng tâi kơxô̆ bauxite kân môi tiah mê ai tơmeăm vâ kong pơlê mơhnhôk tơdroăng tơkêa bro mơ’no liăn cheăng mơnhông mơdêk cheăng kâ, rêh ối pơlê pơla ƀă ai tơnêi krúa lĕm pêi pro tơdroăng vêh xĕn kuăn pơlê rêh ối, vêh xĕn ối kum ăm tơdroăng tơkêa bro chiâ xo bauxite.