Kơxê hâi lơ 3/3, a Hà Nội, Đảng ủy Khô̆i Mơdró xiâm tơnêi têa tơkŭm po Hôp tí tăng ‘nâi plĕng, hriâm tâp, hnê pêi pro tơdroăng ƀă hnê tơdroăng kal ‘na hlá mơ-éa “Khŏm mơ-eăm plâ mơdât kâ kơluâ, pro ôh tá tro, veăng ‘no hnoăng cheăng mơjiâng Đảng ƀă Tơnêi têa rế ton rế krúa lĕm krá rơdêi” dêi pôa Nguyễn Phú Trọng, Kăn xiâm pơkuâ hnê ngăn Đảng. Tối tơbleăng a hneăng hôp, pôa Lê Văn Châu, kăn phŏ hnê ngăn Đảng ủy Khô̆i mâu Khu mơdró xiâm tơnêi têa pơkâ thế, mâu khu, tíu pêi cheăng, mâu đảng ủy dêi râ Đảng ủy khô̆i kal tí tăng ‘nâi plĕng, hriâm tâp trâu rơdâ tơdroăng tung hlá mơ-éa rơtế ƀă tơdroăng hnê pêi mâu pơkâ, luât pơkâ dêi Tíu xiâm luât dêi Tơnêi têa ‘na hbrâ mơdât kâ kơluâ, mơdât pro ôh tá tro tung kăn ƀô̆, đảng viên tung khu mơdró, tíu pêi cheăng.

Tơdrêng a mê, djâ tơdroăng hriâm ‘na tơdroăng kal tung kơxop hlá mơ-éa chêh tơdroăng pêi cheăng dêi Chi bô̆ tiô rêm hneăng, pêi mâu tơdroăng kal vâ pơ’lêh rơdêi ‘na ki hlê plĕng, mơdêk ‘nâi kơ do mơ-eăm xêh, môi tuăn pêi pro dêi mâu kăn ƀô̆ , đảng viên tung hbrâ mơdât kâ kơluâ, pro ôh ti tro.