Tâng ối pakĭng kơdroăng ki păn pú pái tung mê ai 20 to, pôa Quách Thiện, thôn Dak Rmo, cheăm Dak Ndrung, tơring Dak Song, kong pơlê Dak Nông  hâk phiu ăm ‘nâi, păn pu pái hiăng kum rơpŏng hngêi pôa ai tơ’nôm kơxô̆ liăn. Rơpŏng hngêi lăm rêh ối a kố sap ing hơnăm 2006 nah xua ai kuăn hên ƀă ôh tá ai tơnêi pêi kâ mê xuân pơtối cho rơpŏng kơtiê. Apoăng hơnăm 2020, hlo tơdroăng rêh ối dêi rơpŏng hngêi pôa xơpá, mâu đảng viên tung thôn ƀă cheăm hiăng kơjo kum ăm pôa păn 4 to hdrê pú pái, hlối kum pro kơdroăng, hnê túa păn chĕm ăm kâ, hbrâ mơdât pơreăng vâ ai tơ’nôm kơxô̆ liăn pêi lo.

Pú pái ki păn rĕng ai kuăn, tung hơnăm apoăng hiăng ăm pôa châ  tê dêi châ xo lối 10 rơtuh liăn ƀă hơnăm kố tê vâ chê 50 rơtuh liăn. Tơdrêng amê, mâu đảng viên a cheăm, tơring xuân hiăng kơjo kum pôa Thiện mot pro kŏng nhân a môi kŏng ti pêi chiâk deăng tung cheăm. Kơnôm ing mê, tơdroăng rêh ối dêi rơpŏng hngêi pôa chôa tơniăn, hluăn ing  kơtiê:

“Pú pái xuân ăm kâ hlá, kâ kơtâk ƀă nhâ tê. Mâu pú pái xông kân piê lĕm, to lâi to mê xuân hiăng ai kuăn vâ pro hdrê. Xuân mơnê kơ mâu kăn hiăng tŏng kum, kum ăm rơpŏng hngêi kơdroh ki xơpá tâ’’.

Kum rơpŏng hngêi pôa Quách Thiện cho 5 ngế đảng viên mê tá a chi ƀô̆ thôn, a Đảng ủy cheăm ƀă Đảng ủy tơring. Pôa Lương Quốc Lam, Ngế hnê ngăn chi ƀô̆ thôn  Dak Rmo, ăm ‘nâi, rơté ƀă rơpŏng hngêi pôa Quách Thiện hiăng ai tơ’nôm 4 rơpŏng kơtiê tung thôn châ tŏng kum xua túa pêi cheăng dêi ‘’5 đảng viên kum 1 rơpŏng hluăn ing kơtiê’’ ƀă 3 tung kơxô̆ ki mê  hiăng hluăn kơtiê. Tơná pôa Lam xuân veăng kơjo kum rơpŏng pôa Quách Thiện hlo tiah kố, ƀă tơdroăng tí tăng ‘nâi plĕng nhên tơdroăng rêh ối, xuân môi tiah kal vâ, púi vâ mâu rơpŏng kơtiê, mâu troăng rơhlâ kơjo kum cho ai pơxúa khât, hlối tơ ƀrê.

 “Rơpŏng kơtiê ki hên cho ôh tá ai cheăng pêi, liăn vâ pêi cheăng ƀă tơmeăm vâ pêi chiâk. Tung to lâi hơnăm hdrối, chi ƀô̆ ƀă mâu kơvâ cheăng xuân pêi tro troăng rơhlâ ‘’5 ngế đảng viên kum 1 rơpŏng hluăn kơtiê’’, hlo ki tơƀrê. Châ kum, kum cheăm pêi ăm vâi châ hluăn kơtiê ton ‘’.

Jâ Vương Thị Hiền, Kăn phŏ hnê ngăn Vi ƀan Măt trâ̆n tơnêi têa cheăm Dak Ndrung, tơring Dak Song, kong pơlê Dak Nông ăm ‘nâi, klêi lối 2 hơnăm tơbleăng, túa pêi cheăng ‘’ 5 ngế đảng viên kum 1 rơpŏng hluăn kơtiê’’ hlo pêi châ tơƀrê tung cheăm. Nôkố lâp tung cheăm dế ai 52 rơpŏng kơtiê châ mâu đảng viên kum. Ƀă tơdroăng veăng dêi mâu đảng a hên râ, ing thôn troh cheăm, tơring, tơdrêng ƀă tơdroăng veăng tơmâng dêi khu mơdró, khu ai tuăn hơ-ui mê tơdroăng veăng kum ăm tơrêm rơpŏng hngêi ai hên.

Mâu đảng viên ôh tá xê to veăng kum to hdrê pêt, hdrê păn, hnê túa pêt păn mê ối veăng ngăn, kơjo kum tăng tíu tê drêng mâu rơpŏng kơtiê pêi lo tơmeăm. Mâu rơpŏng kơtiê châ khu râ râng kŏng hnê pêi, rơkong hlối tơpui hnê hlối ai tơmeăm, hlối ai tuăn vâ pêi mê tơdroăng cheăng pêi chiâng tơƀrê.

Cheăm xuân ‘nâi nhên tơdroăng kơjo kum kal khât, kum rơpŏng kơtiê hluăn ing kơtiê krá tơniăn ton mê ôh tá kơtâu tiô kơxô̆ hên, mê tơkŭm a ki pêi lĕm tơƀrê.

“Ki khât tung tơdroăng rêh ối dêi kuăn pơlê ối hên xơpá, vâi ối kal ai hên tŭm tơdroăng mê tơdroăng pêi ôh tá pêi hên tiô kơxô̆ mê bú tơkŭm pêi iâ la tơƀrê  xua môi rơpŏng kơtiê mê pin thế kơjo kum hên tơdroăng, ôh tá xê to kơjo kum liăn ah vâi hluăn kơtiê. Vâ ví tơdroăng  ki pơtối vêh kơtiê mê pơlê cheăm thế ‘nâi nhên hiăng kum thế khum khât hlối, kum hên tơdroăng vâ vâi hluăn  kơtiê khât’’.

Ƀă tơdroăng veăng pêi dêi rêm râ, mâu kơvâ cheăng, malối cho veăng tơmâng khât dêi đảng viên ing túa ‘’5 ngế đảng viên kum 1 rơpŏng hluăn  kơtiê’’, hên rơpŏng  kơtiê acheăm Dak Ndrung tối krê, tơring Dak Song tối tơdjuôm hiăng mơ-eăm mơnhông chôa tơniăn tung rêh ối. Tơdroăng kố xuân ăm hlo, tơring Dak Song hiăng pơkâ nhên tro túa pêi cheăng  ƀă prôk tro troăng drêng hriâm ƀă pêi pro tiô troăng tơdjâ, hiâm mơno lĕm tro, túa cheăng Hồ Chí Minh tung pêi cheăng kơdroh kơklêa, xăm kơtiê.