Bu krê tung mâu khế mơ’nui hơnăm kố hiăng ai 1.500 khu mơdró kâ athế kơdroh đơn kế tơmeăm, pro 43 rơpâu ngế pêi cheăng ôh tá ai cheăng pêi. Vâ tŏng kum mâu ngế pêi cheăng tơkâ luâ hneăng ki xơpá kố, Khu xiâm ngăn mâu ngế pêi cheăng Việt Nam tơrŭm ƀă mâu nhãn hàng Bia Saigon ối tung Kŏng ti Bia - Rượu - Nước giải khát Sài Gòn (SABECO) ƀă Tíu xiâm Đoân Droh rơtăm Kŏng san Hồ Chí Minh pơxiâm po Tơdroăng “Rơtế ƀă dêi rơpó bro chiâng ai Têt”, diâp 8 rơpâu hnoăng tơmeăm Têt ăm mâu ngế pêi cheăng tung lâp tơnêi têa.

Tơdroăng “Rơtế ƀă dêi rơpó bro chiâng ai Têt” po sap ing hâi lơ 7 khế 1 troh lơ 15/1/2023. Tiah mê, 8 rơpâu hnoăng tơmeăm Têt ƀă kơnâ 5,6 rơtal liăn kô châ diâp ăm mâu ngế pêi cheăng a 11 to kong pơlê, pơlê kong kân tung lâp tơnêi têa. Rêm hnoăng kơnâ 700 rơpâu liăn tung mê ai 300 rơpâu liăn mâ ƀă mâu kế tơmeăm xúa hâi Têt. Tung rôh Têt troh hơngui vêh, tơdroăng “Rơtế ƀă dêi rơpó bro chiâng ai Têt” ối djâ troh mâu tơdroăng Têt 3 kơpong a 5 to kong pơlê: Pơlê kong kân Hà Nội, Nghệ An, Bình Dương, Dak Lak, Long An ƀă mâu tơdroăng ki xah tiô khôi chal krâ nah ki hmâ ƀă hên tơdroăng xah ki hơniâp ro ki ê.