Pri Hlá tơbeăng kơpong Tây Nguyên rôh apoăng châ tơkŭm, cho vâ tơmâng xo, mơhnhôk, khĕn kơdeăn mâu ngế ki chêh hlá tơbeăng ki rơkê, mơ’no hơnăm 2023, chêh ‘na Tây Nguyên. Ing 250 ƀai ki veăng tơ’noăng ƀă 4 túa hlá tơbeăng, hlá tơbeăng in, hlá tơbeăng điê̆n tưh, pơchuât ƀă um tơvi, Khu tơkŭm po hiăng rah xo lối 100 ƀai mot tung rôh tơ’noăng mơgêi.

Klêi mê ai 22 ƀai châ kâ pri, mê cho 2 pri ối má môi, 4 pri ối má péa, 6 pri ối má pá ƀă 10 pri mơhnhôk. Mâu ƀai ki veăng tơ’noăng ai tơdroăng tơmâng ngăn chêh rơkê ‘na tơdroăng kal ƀă túa pơkâ. Ai mâu ƀai ai inâi nếo, ‘nâng ‘nâi, ki kal tơdjâk troh, ăm mâu ngế ki chuât ngăn hâk vâ. Malối cho túa ki lĕm ƀă ivá mơ-eăm rak vế khôi túa, lĕm tro dêi khu kăn pơkuâ mâu kong pơlê ƀă mâu kuăn pơlê hdroâng kuăn ngo Tây Nguyên.