A hâi ki mơ’nui măng tĭng, tung plông tâ tá ki kân dêi Hngêi trung Mâm non Bình Minh, cheăm Ea Na, kong pơlê Dak Lak tâng nếo mâu rơkong tơpui tơno, tó phiu ro. Mâu vâi o dế mơdrốu hâk vâ lăm ngăn tơdroăng ki mơđah hơdruê xuăng, kâ mâu kơƀăn, kĕo ƀă châ xo kế tơmeăm. Muăn H’Jun Niê Ksơr, 5 hơnăm, hok tro lâm Hlá, ai tối tiah kố:

“Hâi kố, á muăn hơniâp ro ó khât, xua kơnôm ai mâu vâi cô, vâi xăng xing xoăng ăm ngin kơƀăn, kĕo. Ngin muăn mơnê kơ mâu vâi tăm, vâi miê, ƀă vâi xăng.”

Tơdroăng po leh Trung thu dó inâi “Hơniâp ro idrâp rơkong tó-kô pơtroh tơdroăng ki mơjo pâ” xua Lâm Trung cấp Lý luận Chính trị A55A, Hngêi trung Chính trị kong pơlê Dak Lak tơkŭm po, hiăng diâp 210 hnoăng kơƀăn, kĕo ăm hok tro tung hngêi trung. Jâ Nguyễn Thị Lệ Nga, Kăn pơkuâ ngăn hngêi trung mâm non Bình Minh tối ăm ngin ‘nâi:

“Vâi o, vâi muăn hok tro akố pơrá cho mâu hok tro hdrông kuăn ngo, ki hên to mâu kuăn ‘nĕng, cháu chái dêi nôu pâ, jâ pôa ki tro rơhbáu jâi. Mâu vâu o, vâi muăn akố, rêh ối tung rơpŏng hngêi trâm hên xahpá, mâu tơmeăm khoăng ki kố cho ki xiâm vâ mơhnhôk hiâm mơno kân ƀă mâu vâi cô, vâi hok tro dêi hngêi trung.”

Xuân a roh kố, a ƀuôn Tuôr B, cheăm Ea Na, tơdroăng ki tŏng gum kơƀăn kĕo, kế tơmeăm, liăn ngân, tơkŭm po tơdroăng xah hêi, xua Khu ki séa ngăn cheăng dêi kong pơlê Dak Lak tơrŭm cheăng diâp ai 75 hnoăng kơƀăn kĕo vâ ăm mâu vâi hdrêng ƀă rơpŏng ki kơtiê xahpá.

Ôh ta xê to a cheăm Ea Na, hên pơlê cheăm a Dak Lak tung mâu hâi ki kố xuân hơniâp ro, sôk suâ, châ tâng idrâp hơkâ chuât, châ ngăn vâi xuăng prếo, châ xah hêi râng mâu on tơdrong, ai hên mơngiơk. A cheăm Ea Mdroh, ai 300 kơxu, hnoăng kế tơmeăm hiăng châ chiân pơtroh ăm vâi hdrêng a pơlê lăm pro kăch măng hdrối nah, ing tơdroăng ki dó inâi On tơdrong têk vâ bâ eăng ăm hiâm tuăn pói rơhêng vâ. A ƀuôn Čư Akŏ Êmông, Khu ngăn Đoân Droh rơtăm cheăm Dang Kang hiăng tơrŭm, ƀă mâu kâu lăk ƀô̆ ki mơhnŏng pleăng dêi hnoăng cheăng, hiăng tơkŭm po xuăng prếo, pế xup kơteăm, pôe xâk ôh tá xo liăn a 2 pơlê cho ƀuôn Čư̆ Pâm ƀă Čư Akŏ Emông. Ai 40 hnoăng kế kâ ki ê châ pơtroh ăm mâu rơpŏng kơtiê a 2 pơlê kố.

Hiâm mơno phiu ro Trung thu ối troh ƀă mâu vâi o, vâi muăn a Tiu xiâm Tŏng gum Pơlê pơla ƀă vâi hdrêng dêi kong pơlê Dak Lak kơnôm ing roh po Kơmăng khế mơniâ, xua Khu ngăn ‘na pơkeăng ƀă khăm pơlât tơkŭm po. Mâu vâi o châ veăng tơ’noăng pro on tơdrong, châ mơđah hơdruê xuăng, châ kâ kơƀăn kĕo, ƀă châ tơdah xo kế tơmeăm, châ xo liăn hriâm. Pôa Nguyễn Xuân Quý, Kăn pơkuâ ngăn tíu xiâm kố tối ăm ngin ‘nâi:

“Hơnăm kố, Khu ngăn ‘na pơkeăng ƀă khăm pơlât hiăng tơkŭm po môi tơdroăng xah hêi a Tíu xiâm tŏng gum pơlê pơla kong pơlê Dak Lak ƀă a môi tíu ki ngăn ‘na pơlê pơla, tung mê, ai tơdjâk pêi pro hên tơdroăng, môi tiah tơ’noăng pro on tơdrong, tơ’noăng mơđah hơdruê xuăng, xing xoăng kơƀăn kĕo tung hâi ki hơniâp ro trung thu mê. Tơdroăng kố xuân hiăng mơhnhôk hên khu ki kro mơdrŏng, ai liăn ngân hên, veăng tơkŭm lăm tŏng gum liăn ngân, kế tơmeăm, kơƀăn kĕo ăm mâu vâi hdrêng ki xahpá la kơdo mơ-eăm tơkâ luâ tơdroăng pá puât vâ hriâm rơkê. Ing mê, pói rơhêng vâ kô djâ troăng lĕm tro ăm kơdrâm vâi ‘nĕng ki ê, mâu vâi hdrêng ki xahpá la ‘nâi kơdo mơ-eăm vâ prôk tơkâ luâ xahpá, mơ-eăm xông hriâm rơkê, mơngế kuăn cháu loi nguăn kơ Pôa Hồ, ƀă cho mâu ngế ki ai pro pơxúa ăm pơlê pơla.”

Tung idrâp hơkâ ki hơniâp ro, rơkong tó, hơniâp ro dêi mâu vâi o, vâi muăn ai tá rơkong ki tríu hâk suâ kơ mâu ngế ki tô hơkâ, xuăng prếo, tơdroăng ki hơniâp ro mê hiăng mơhno hlo nhên a tơrêm ngiâ méa dêi vâi ‘nĕng, vâi hdrêng ki troh tơkŭm a tíu mê. O Nguyễn Thị Minh Châu ai tối tiah kố:

“Hbrâ vâ xah hêi a hâi Trung thu, mê ngin mâu vâi muăn akố hiăng mơhriâm hơdruê xuăng, pro on tơdrong, mơhriâm xuăng prếo. Á muăn hâk vâ má môi mê cho xuăng prếo, tơkôm tơngah mâu vâi ki kân hbru ăm kơƀăn kĕo, kế tơmeăm. Rêm xoh troh a hâi Trung thu mê ngin muăn akố kơnôm ai tơdroăng tŏng gum dêi khu ki ai hiâm mơno ‘nâi mơjo pâ, hơ-ui gum, mâu ngế ki dah ai xêh liăn ngân, kế tơmeăm, mâu khu kăn pơkuâ hiăng hbru ăm ngin mâu kơƀăn kĕo maluâ bu iâ la ƀă tuăn mơno ngin tâ kơnía ó kân păng ‘nâng.”

O Nguyễn Ngọc Hân hơniâp ro hơ’muăn tối tiah kố:

“Rêm hơnăm akố, mâu vâi miê, vâi xăng xuân hmâ tơkŭm po mâu hneăng xah hêi trung thu ăm mâu ngin vâi muăn kuăn cháu, châ xing xoăng hên kơƀăn kĕo, châ kâ mâu tơmeăm ƀă châ rah xah hêi mâu khu on tơdrong. Ngin muăn hiăng mơjiâng pro xêh krê mâu túa on tơdrong, klêi mê, vâ tơno tối ăm pú hên i tơmâng, i ngăn. Mâu ngin muăn xuân hiăng mơhriâm hơdruê xuăng, mâu tơdroăng hơdruê xuăng dêi mâu vâi ngoh nâ ki kân, mê cho “Krếo ngoh vêh a Tây Bắc”, tơdroăng hơdruê xuăng ki ngin mâu vâi o ki kŭn kố cho “Trung thu chu a kơphô̆.”

Mâu kế tơmeăm, tơdroăng xah ôm hêi ki hơniâp ro rơtế ƀă nâ Hằng ƀă tăm Cuội hiăng gum hên mâu vâi o, vâi muăn, vâi ‘nĕng ki ai tơdroăng rêh ối xahpá a Dak Lak châ hlê plĕng nhên, hneăng ki po mơđah xah hêi Têt Trung thu kố cho vâ mơhno  hiâm tuăn ki mơjo pâ, hơ-ui gum ăm kơ mâu vâi pú ki xahpá, ai tuăn mơjo vâ kâi tơkâ luâ mâu tơdroăng ki xahpá, ai tuăn mơno loi nguăn, mơhriâm kơhnâ rơkê khât.