Hơnăm 2023, kong pơlê Dak Nông châ pơcháu tơdroăng ki rah xo lối 1 rơpâu ngế rơtăm lăm bro mố đô̆i tung mâu tíu pêi cheăng tung mâu khu lêng ƀă kŏng an. Tơdroăng ki rah xo ƀă krếo thế kuăn pơlê bro mố đô̆i hiăng châ mâu cheăm, tơring pêi pro kơtăng khât, krá tơniăn, rak vế tơniăn krê, tơdâng tơ’mô, tơbleăng tơdrăng, tro pơkâ dêi Luât bro mố đô̆i. Troh nôkố, tâi tâng 8 tơring, pơlê kong kơdrâm a kong pơlê Dak Nông hiăng klêi tơdroăng ki rah xo xuân môi tiah tơdroăng ki tơrŭm môi tuăn ‘na inâi, hồ sơ ƀă mâu tíu pêi cheăng tơdah xo lêng ƀă tơbleăng tơdroăng ki krếo thế lăm bro mố đô̆i, hbrâ rơnáu ăm hâi mơdĭng lăm bro mố đô̆i.

Thiê̆u tă Phan Huy Hùng, ngế ki pơkuâ Khu pơkuâ ngăn lêng pơlê kong kơdrâm Gia Nghĩa, kong pơlê Dak Nông, ăm ‘nâi. Tung rôh Têt Lo hơnăm Quý Mão, khu râ pơkuâ cheăng a cheăm tơring rêm râ ƀă mâu khu tơrŭm cheăng kal kí pơlê pơla tơkŭm po hên khu lăm pôu kơ-êng mơhnhôk mâu vâi rơtăm xuân môi tiah rơpŏng hngêi ki ai kuăn muăn lăm bro mố đô̆i tung hơnăm 2023.

Ing mê xuân ‘nâi nhên hiâm mơno tơdroăng ki loi tơngah, xuân môi tiah tơdroăng ki tŏng kum mâu tơdroăng xơpá tơvâ tơvân, bro tơ’lêi hlâu ăm mâu rơtăm hmiân tuăn bro mố đô̆i.