A rôh pêi cheăng ƀă Ngế pơkuâ hnê ngăn xiâm Đoân Droh rơtăm Kŏng sản Hồ Chí Minh pôa Vương Đình Huệ, Kăn xiâm hnê ngăn Kuô̆k hô̆i khĕn kơdeăn tơdroăng cheăng pêi Tíu xiâm Đoân rah xo tơdroăng pêi cheăng tung hơnăm 2023 ƀă tơdroăng cheăng Khế droh rơtăm rơtế ƀă “Pơ’lêh kơxô̆”. Kố cho tơdroăng cheăng pêi ki kal, pêi tơdrêng, pêi thế tro tiô troăng pơkâ tơjuôm dêi rơxông, chông djâ tơnêi têa pin tơrŭm trâu rơdâ a tơdroăng mơnhông tơdjuôm dêi lâp plâi tơnêi.

‘Na tơdroăng cheăng Đoân ƀă tơdroăng mơhnhôk mâu droh rơtăm mâu phô̆m xông kân  ƀă vâi o tung la ngiâ, Kăn xiâm hnê ngăn Kuô̆k hô̆i pơkâ thế, Tíu xiâm Đoân Droh rơtăm Kŏng sản Hồ Chí Minh kal pơtối tí tăng ‘nâi plĕng, tơmâng hnê khât tâ nếo tơdroăng tơbleăng hnê mơhno dêi pôa Nguyễn Phú Trọng, Kăn xiâm pơkuâ hnê ngăn Đảng a Hneăng hôp Đoân Droh rơtăm tung lâp tơnêi têa má 12; mê cho hnê tối nhên tơrêm tơdroăng cheăng pêi.

Pôa Vương Đình Huệ, Kăn xiâm hnê ngăn Kuô̆k hô̆i pơkâ thế:

“Đoân droh rơtăm Kŏng sản Hồ Chí Minh kal hlê trâu tâ nếo hnoăng cheăng pêi ƀă ki rơdêi dêi tơná, mơdêk hlê plĕng hnoăng cheăng pêi, ôh tá la lâi pơtê mơ-eăm, thế mơ-eăm hriâm, ‘mâi rơnêu, hriâm tâp mơdêk rế hlê plĕng, ai hiâm tuăn lĕm dêi kăch măng, tơbâ tơdroăng púi vâ dêi droh rơtăm vâ mơhno ivá rơdêi ton nah, djâ troăng ahdrối tung mơjiâng ƀă kring vế Tơnêi têa.

Mơdêk hnê hriâm ăm rơxông ối nếo ‘na tuăn tơmiât cheăng dêi Kăch măng, hiâm mơno lêm, tơdroăng rêh ối  tro tiô túa nếo kring vế Tơnêi têa. Mơdêk hnê hriâm ăm rơxông ối nếo ‘na tuăn tơmiât dêi kăch măng, hiăm mơno lĕm tro, tơdroăng rêh ối tiô túa tơniăn, mơdêk ai hiâm mơno pâ nhoăm tơnêi têa, hâk tơngăm hdroâng mơngế, malối cho ai tơmiât, púi vâ mơjiâng  tơnêi têa xông rơdêi, hơniâp ro ƀă hlê nhên hnoăng cheăng dêi tơná tung tơdroăng mơjiâng ƀă kring vế tơnêi têa”.

Tơdrêng ƀă tơdroăng mơnhông tơnêi têa dêi tơdroăng cheăng pơ’lêh nếo tung xúa cheăng ƀă kơmăi kơmok 4.0, tơdroăng cheăng kâ, kal kí, rêh ối pơlê pơla, droh rơtăm dế pro ăm rĕng. Pôa Vương Đình Huệ Kăn xiâm hnê ngăn tơnêi têa pơkâ thế  Đoân Droh rơtăm thế đi đo ‘nâi hriĕn plĕng ki nếo, ôh tá la lâi pơtê pơ’lêh nếo tơdroăng, troăng rơhlâ pêi cheăng vâ pêi tro tiô vâ, tơdroăng púi vâ dêi droh rơtăm, xo droh rơtăm cho ki xiâm vâ hriăn plĕng ki nếo mâu tơdroăng cheăng, tơkŭm po mâu tơdroăng cheăng đi đo ai pơxúa tơxâng dêi droh rơtăm.

Tơkŭm cheăng Đoân ƀă Droh rơtăm thế cho mâu ngế ki pleăng tơná prôk hdrối tung pêi cheăng tiô troăng rơhlâ mơdêk pơ’lêh kơxô̆ dêi tơnêi têa; mơnhông cheăng kâ kơxô̆ a tơdroăng ‘na khoa hok ƀă kơmăi kơmok, pơ’lêh hriăn plĕng ki nếo.

Xuân tung măng tĭng kố, Tíu xiâm Đoân Droh rơtăm Kŏng sản Hồ Chí Minh ƀă Tổng kŏng ti Bưu điện Việt Nam (Vietnam Post) tơkŭm po Leh kĭ tơhrâ tơrŭm cheăng pơla hơnăm 2023- 2026 ƀă tơdroăng tơkŭm a mâu tơdroăng veăng kum pơ’lêh kơxô̆ ăm mâu đoân viên, droh rơtăm. Tối tobleăng a leh kĭ tơhrâ, Ngoh Bùi Quang Huy -  Kăn hnê ngăn Má môi Tíu xiâm Đoân Droh rơtăm ăm ‘nâi, Tíu xiâm Đoân ‘nâi nhên mâu droh rơtăm thế cho mâu ki xiâm tung tơdroăng pơ’lêh kơxô̆.

Xua mê, tơdroăng kĭ tơhrâ tơrŭm cheăng mê kô veăng ‘no hnoăng mơdêk pêi tơdroăng cheăng kum pơ’lêh kơxô̆  ăm mâu đoân viên, droh rơtăm:

“Pin hiăng kĭ tơhrâ hâi kố nôkố cho kĭ tơhrâ a 3 râ, râ xiâm tơnêi têa, râ kong pơlê, râ tơring. Tơdroăng mê pro mâu tơdroăng kĭ tơhrâ pơla péa pâ kô rĕng châ pêi klêi kĭ. Klêi tơdroăng mê a tơngah péa pâ kô pơ’lêh mâu tơdroăng hiăng kĭ ƀă kô kâi riên ki tơƀrê dêi tơdroăng cheăng tiô hneăng, tơdroăng mê kum pin mơdêk tơƀrê tơdroăng cheăng tơrŭm pơla péa pâ”.

Tiô tơhrâ tơrŭm cheăng, pơla hơnăm 2023-2026, péa pâ kô tơkŭm tơrŭm tối tơbleăng mâu tơdroăng cheăng kơjo kum pơ’lêh kơxô̆ ăm đoân viên droh rơtăm ƀă hbrâ tơdroăng cheăng tê mơdró a kơxô̆, malối cho droh rơtăm thôn pơlê.

Pôa Nguyễn Hải Thanh - Kăn xiâm hnê ngăn Hô̆i đong cho tung khu dêi Tổng kŏng ti Bưu điện Việt Nam ăm ‘nâi:

“Bưu điện Việt Nam pơtối rơtế ƀă Đoân Droh rơtăm Kŏng sản Hồ Chí Minh tung mâu tơdroăng cheăng rêh ối pơlê pơla, tơdroăng cheăng tung kuăn pơlê môi tiah kơjo kum tê kơtê, kơdroh yă mâu tơmeăm tŏng kum, kơjo kum yă cước ăm mâu tơmeăm pơxiâm pêi cheăng dêi droh rơtăm thôn pơlê; tơrŭm  tơkŭm po  mâu tơdroăng, tơmeăm khoăng pêi dêi droh rơtăm ki kân râ tơnêi têa, kơdroh kơklêa xăm kơtiê, tơniăn rêh ối pơlê pơla krá tơniăn... veăng ‘no hnoăng mơjiâng tơdroăng pơkâ dêi tơnêi têa ‘na mơjiâng thôn pơlê nếo, mơjiâng kơphô̆ rơkê plĕng”.

Tung tơdroăng pêi pro tơhrâ, Vietnam Post tơrŭm ƀă Tíu xiâm Đoân hnê ăm mâu droh rơtăm tung lâp tơnêi têa mơdêk hlê plĕng ‘na pơ’lêh kơxô̆, hlối hbrâ mâu tơdroăng cheăng pêi ki kal hlê tung mơdró kâ ‘na pơ’lêh kơxô̆ môi tiah: Xúa mâu tơmeăm marketing túa nếo nôkố, ki rơkê drêng livestream tê tơmeăm, mơjiâng tơdroăng mơđah ai um tơmeăm tơtro dêi marketing, rak ngăn ƀă rak ngăn mơngế ki rôe...  

Vietnam Post kô kơjo kum đoân viên droh rơtăm tung lâp tơnêi têa po tơbleăng tê tơmeăm tung điê̆n tưh Postmart.vn.