Vâ pêi pro tơdjâk ki kơnía ‘na kơxop hlá mơéa “Khŏm mơ-eăm, tơplâ mơdât kâ kơluâ, veăng kum mơjiâng Đảng ƀă Tơnêi têa pin rế hía rế krúa, rơdêi” dêi pôa Nguyễn Phú Trọng, kăn xiâm pơkuâ hnê ngăn Đảng tung rêm râ pơkuâ Đoân ƀă đoàn viên, droh rơtăm tung Khôu mâu kơ koan Tơnêi têa, kơxê lơ 13/3 a Hà Nội, Khu pơkuâ ngăn Đoân Khô̆i tơkŭm po rôh hôp “Hơnăm ối nếo Khô̆i mâu kơ koan Tơnêi têa khŏm mơ-eăm hbrâ, tơplâ mơdât kâ kơluâ”.  

A rôh po hneăng hôp, kăn phŏ pơkuâ Học viện Chính trị Quốc gia Hồ Chí Minh Lê Văn Lợi tối nhên, kố cho hneăng hôp khoa hok mơhno tơdroăng ki tơmâng ngăn ó khât dêi mâu hơnăm ối nếo Khu mâu kơ koan Tơnêi têa ƀă hnoăng cheăng tơplâ mơdât kâ kơluâ. Mâu ngế ki veăng tơpui tối a rôh hôp hiăng tơkŭm tơpui tung mâu tơdroăng ki kal, môi tiah: Hlo nhên mâu tơdroăng ki kâ kơluâ, pơtối tối nhên khŏm hbrâ mơdât kâ kơluâ xua Đảng ƀă Tơnêi têa tơbleăng cho môi tơdroăng ki kal ôh tá chiâng pro pơ’lêh.

Pro nhên mâu tơdroăng ki veăng kum dêi hơnăm ối nếo Khôu mâu kơ koan Tơnêi têa tung hnoăng cheăng hbrâ mơdât kâ kơluâ tung pơla hdrối nah. Ing mê, pơkâ mơ’no mâu troăng hơlâ, hnoăng cheăng vâ mơdêk tâ nếo hnoăng cheăng, khŏm mơ-eăm dêi hơnăm ối nếo tung Khu mâu kơ koan Tơnêi têa “Tối ôh ƀă kâ kơluâ”.