Kơxê lơ 14/12, Khu pơtâng hnê tối tơdroăng kal cheăng Đảng kong pơlê Gia Lai tơrŭm ƀă Kŏng ti xiâm Tân Cảng Sài Gòn, tơkŭm po Leh mơgêi ƀă diâp pro Roh tơ’noăng ‘’Ti tăng plĕng ‘na têa kơxĭ, rơlố Việt Nam ƀă 40 hơnăm Tơkêa Khu lâp kong têa ‘na Luât têa kơxĭ hơnăm 1982”. Tơkŭm po lối 3 khế, hiăng ai 7 hneăng tơ’noăng tung roh tơ’noăng châ tơkŭm po, mơhnhôk châ lối 840 rơpâu roh ngế tơ’noăng tung lâp tơnêi têa. Khu tơkŭm po hiăng diâp 147 pri krê (ai: 7 pri Má môi, 14 pri Má péa, 21 pri Má pái ƀă 105 pri Mơhnhôk).

Khu tơkŭm po xuân pơkâ diâp 3 pri khu pú hên ăm 3 đảng ƀô̆ ối tung Khu pơkuâ hnê ngăn cheăng Đảng kong pơlê, pri Má môi ối ‘na Đảng ƀô̆ tơring Ia Pa, rơtế pri má péa châ Đảng ƀô̆ pơlê kong kơdrâm Plei Ku ƀă Đảng ƀô̆ tơring Čư̆ Prông. Klêi kơ’nâi roh tơ’noăng, tâi tâng mâu râ kuăn pơlê, kăn ƀô̆, đảng viên pơtối ‘nâi nhên krá tơniăn troăng hơlâ, troăng pơkâ pêi, troăng tơmiêt dêi Đảng, luât dêi Tơnêi têa Việt Nam ƀă luât lâp plâi plâi tơnêi têa ‘na pơkuâ, gâk kring hnoăng pơkuâ têa kơxĭ, rơlố dêi Tơnêi têa.