Kuăn pơlê a thôn 1, cheăm Hà Tam, tơring Đăk Pơ xo rak tung pơkuâ, gak ngăn vâ chê 260 ha kong ing Khu pơkuâ ngăn kong peăng Kơnhŏng An Khê. Mâu hâi khế 3, kong tô mơdrăng khăng khoăng hiăng pro kong akố ai hên hlá răng, mâu rơbŏng, rơtêu hiăng khăng khoăng tơ’lêi tro on chếo kâ kong. Vâ hbrâ mơdât on, mê cheăm Hà Tam hiăng mơjiâng mâu khu pơkuâ ngăn, mơjiâng hên tíu gak ngăn, rak vế ngăn kong. Ki rơhêng vâ tối khu kố hiăng pro ahdrối tơdroăng ki chôu hlá pê hdrối, kơvê hdró tơkăng vâ mơdât on chếo lân kâ a kơpong ki tơ’lêi tro on chếo kâ.

Pôa Phạm Đông Mạnh, ối a thôn 1, cheăm Hà Tam, tơring Đăk Pơ tối, rơpŏng ki tơdah xo rak vế ngăn kong tối ăm ‘nâi:

“Mâu khu ai sap ing 2 troh a 3 ngế lăm rak ngăn plâ hâi plâ măng, drêng ai tơdroăng xía vâ mê ngin kô pơtâng tối ăm khu pơkuâ rak ngăn kong peăng Kơnhŏng An Khê ƀă ngin kô mơhnhôk tâi tâng mâu khu râ pơkuâ thế pêi pro 4 hnoăng cheăng, tung mê, mơngế ki ối akố, pơkuâ djâ pêi hnoăng cheăng a tíu kố, rơxế tơmeăm ing tíu kố, tơdroăng kum ‘na kế kâ a tơná ngin kố, mâu tơdroăng mê ngin kô pêi pro tơniăn, tơrŭm tơtro vâ mơdât mâu tơdroăng xía vâ”.

Khu pơkuâ ngăn kong rak vế kơnhŏng têa Peăng Kơnhŏng An Khê, tơring Đăk Pơ, kong pơlê Gia Lai dế nôkố rak ngăn lối 10 rơpâu ha, tung mê, tơnêi kong châ 3 rơpâu 600 ha, pêt kong ai dâng 1 rơpâu ha. Sap ing apoăng hơnăm, khu ngin hiăng vêh mơnhông hnoăng cheăng dêi Khu hnê mơhno tung hbrâ tơpâ mơdât on chếo kâ kong, klêi mê, tăng rah 4 khu pơlê pơla vâ tơdah xo tơnêi kong, xuân cho vâ pơkuâ ngăn ‘na tơpâ mơdât on chếo kâ kong.

Pôa Lê Thái Hùng, Kăn pơkuâ ngăn khu rak vế ngăn kơnhŏng têa, peăng Kơnhŏng An Khê, tơring Đăk Pơ, kong pơlê Gia Lai tối ăm ‘nâi, khu kố dế thăm mơdêk tơdroăng seá mơnhên ngăn, mơ’no ăm mâu kăn ƀô̆ rơtế ƀă mâu pơkuâ rak ngăn kong đi đo gak ngăn a kơpong ki xiâm vâ rĕng teăm châ hlo, vâ mơdât tơdroăng ki lơ trâm tro on chếo kâ, tơdrêng amê, mơjiâng mâu khu, mâu râ tung hbrâ tơpâ mơdât on chếo kâ kong troh a hrĭng ngế. Khu kố xuân pơkâ pêi pro mâu troăng hơlâ kih thuât, môi tiah kơvê troăng tơkăng, chôu lôi hlá pê vâ pôi tá ăm on châ chếo kâ kong.

“Khu ngin xuân hiăng đi đo lăm seá ngăn, pơkuâ ngăn nhên khât ƀă khu ki pơkuâ ngăn kong, tơrŭm cheăng ƀă mâu khu râ, kơvâ cheăng vâ hnê mơhno tối, tơrŭm cheăng drêng ai on chếo kâ kong, mơhnhôk khu râ veăng pêi pro adrêng. Pakĭng mê, Vi ƀan hnê ngăn kong pơlê ƀă mâu râ xuân hiăng tŏng kum, tơveăng ăm pêi pro tiô mâu tơdroăng ki chôu hlá pê, kơvâ troăng tơkăng vâ pôi tá ăm on châ chếo kâ kong, khŏm mơ-eăm mơdât tơdroăng on chếo kâ kong”.

Tơring Đăk Pơ dế nôkố dế pơkuâ ngăn vâ chê 24 rơpâu ha kong, tung ai lối 19 rơpâu ha kong ki chiâng xêh. Pôa Đào Duy Tuấn, Ngế pơkuâ ngăn loăng pơlái kế kong dêi tơring Đăk Pơ tối ăm ‘nâi, khu kố hiăng mơjiâng tơdroăng hbrâ tơpâ mơdât on ƀă pêi pro tŭm têk mâu tơdroăng ki hbrâ mơdât kong a râ tơring, cheăm; thăm mơdêk tơdroăng hnê tối, mơhnhôk kuăn pơlê, tí tăng mơnhên ngăn mâu khu pơkuâ rak ngăn kong, Vi ƀan hnê ngăn cheăm vâ hnoăng hbrâ tơpâ mơdât on châ tơƀrê khât.

“Sap apoăng hơnăm troh nôkố tá hâi ai tơdroăng ki on chếo kâ kong, maluâ ti mê, khu ngăn ‘na kong kế, nhâ loăng ôh tá tơngôu, ôh tá piu hiât dêi hnoăng cheăng tơpâ mơdât on. Athế đi đo pơkuâ hnê ngăn kăn ƀô̆, mâu ngế ki pêi cheăng, athế tơrŭm ƀă Vi ƀan hnê ngăn mâu cheăm, mâu khu râ ki pơkuâ rak ngăn kong, thăm hnê tối, rak vế tiô 4 hnoăng cheăng a pơlê cheăm dêi tơná, vâ kô châ teăm tơpâ mơdât on, ki rơhêng vâ tối, thăm mơdêk tơdroăng tơpâ mơdât on chếo kâ kong”.