Hâi lơ 21/2, Khu rak ngăn loăng pơlái kuăn kiâ kong Gia Lai ai hlá mơ-éa pơtroh pơkâ thế mâu tíu pêi cheăng ki ối tung khu rĕng tơrŭm ƀă tơring Kông Chro séa ngăn rôh ki keo kơdong 125 to xiâm loăng kong a kơpong 7, kơpong 10 ối tung Kŏng ti pêi cheăng tiô rơnó môi tung khu ngăn pêt kong Kông H’de, Khu rak ngăn loăng pơlái kuăn kiâ kong tơring Kông Chro tơrŭm ƀă mâu kơvâ cheăng ki ai tơdjâk troh kŏng ti kố rak ngăn.

Klêi mê ăm hlo, ai 125 to xiâm loăng ki kân ối tung Kŏng ti pêi cheăng tiô rơnó môi tung khu Lâm nghiệp Kông H’de, mê cho căm xe, loăng tróu, loăng kơxêng ká tro keo kơdong. Tâi tâng ki hngăm dêi loăng pŭm ki tro keo ai 30,2 met khô̆i. Nôkố, mâu kơvâ cheăng ki ai tơdjâk troh dế pơtối chêh pro hồ sơ, tăng rup ngế ki bro xôi, pơxâu phâk tiô pơkâ.