Kơxê lơ 9/3, Kŏng an kong pơlê Gia Lai tơkŭm po Leh tơbâ 75 hơnăm Kŏng an kuăn pơlê hriâm tâp, pêi pro 6 tơdroăng Pôa Hồ hnê; 75 hơnăm hâi mơjiâng khu kŏng an kuăn pơlê ƀă pơ-ô pơ-eăng mâu ngế ki kơhnâ rơkê. Pêi pro 6 tơdroăng Pôa Hồ hnê khu kŏng an kuăn pơlê, tung pơla kố nah, Kŏng an Gia Lai đi đo pro tơniăn rêm tơdroăng pá puât, tơkŭm gâk kring tơniăn mâu pơkâ pêi ki xiâm ƀă mơdât mâu ngế xôi, gâk kring tơniăn ƀă mơjiâng khu.

Pơtối mê, Kŏng an kong pơlê hiăng hbrâ pêi pro tơdâng tơ’mô, kơtăng mâu hnoăng cheăng, troăng pêi, teăm tơdrêng tơleăng mâu tơdroăng ki má môi ‘na gâk kring; tơniăn lĕm, tơleăng teăm tơdrêng mâu roh tơxup tơbriât, tơdroăng ki tơhôu tung kuăn pơlê, ôh tá ăm chiâng ‘’tíu ki tô’’ pro ôh tá tơniăn tung kring vế.

Châ hlo, mơdât ƀă ‘nhê troăng pêi pro djâ mơngế hdroâng kuăn ngo tơkâ tíu tơkăng kong, pơxâu phâk hên ngế pro xôi gâk kring tơnêi têa. Rơtế ƀă mê, Kŏng an kong pơlê Gia Lai xuân hiăng kêi đeăng tro tơdroăng tơkêa bro mơjiâng pro, pro ăm ƀă pơkuâ Căn cước kuăn pơlê ƀă hía hé.

A leh tơbâ, 2 khu pú hên, ngế krê châ mơnhên Ƀâng kheăn kơdeăn dêi Ngế xiâm pơkuâ Kŏng an; 20 khu pú hên, ngế krê châ tơdah ƀang kheăn kơdeăn dêi Kăn xiâm hnê ngăn Vi ƀan kong pơlê Gia Lai ƀă 50 khu pú hên, ngế krê châ tơdah Mơ-éa kheăn kơdeăn dêi Kăn pơkuâ Kŏng an kong pơlê Gia Lai xua hiăng châ tơƀrê tung mâu tơdroăng tơ’noăng pêi pro 6 tơdroăng Pôa Hồ hnê ăm khu Kŏng an kuăn pơlê.