Péa khế apoăng hơnăm 2023, kơxô̆ liăn châ xo ing tê tơmeăm pêi lo ing chiâk deăng ngi kong têa ê a kong pơlê Gia Lai hiăng châ 150 rơtuh dollars, tâk 11,11% tâng pơchông ƀă khế kố hơnăm hdrối. Tiô jâ Đào Thị Thu Nguyệt – Kăn phŏ pơkuâ Khu ngăn cheăng kơmăi kơmok ƀă tê mơdró Gia Lai, kơxô̆ liăn pêi lo ing tê tơmeăm ngi kong têa ê dêi kong pơlê tâk hên tung 2 khế apoăng hơnăm cho xua ai mâu kong têa ki kân hiăng tah lôi tơdroăng pơkâ Zero COVID.

Hlo vâ xúa mâu rôh tơ’lêi hlâu kố, mâu khu mơdró kâ dêi kong pơlê Gia Lai hiăng hbrâ rơnáu nhên kế tơmeăm vâ tê ăm mâu kơchơ tê mơdró. Tung mâu kế tơmeăm ki tê ngi kong têa ê dêi Gia Lai, ki xiâm cho kơphế, kơxu tâk hên tá tơdroăng ki tê ƀă ki kơnâ. Krê kơphế xuân ối châ vâ chê 90% tung tâi tâng ki kơnía kế tơmeăm pêi lo ing chiâk deăng tê ngi kong têa ê.

Pakĭng mê, hơnăm kố, mâu plâi kâ ƀă mâu kế tơmeăm pro sap ing plâi tê ngi kong têa xuân tâk rĕng kơnôm tơdroăng ki kong pơlê hiăng châ mơnhên lối 150 mah kơpong pêt ƀă tíu ki tâ tung kơthung. Tung mê, mâu kế tơmeăm châ tê ngi kong têa ê ki hên cho priât, krui kơxái.