A mâu tíu tê xơmong, hmốu prêi, mơ-eăm vâ pro hngêi a cheăm Phù Cát, mâu hâi ki klêi kơ’nâi khía mơhot kân roh má 13 plong mot, kơdrâ hlo hên tơmối tâ mâu hâi tiah hmâ, malối cho tơmối ki lăm roê gât ƀă tôl. Pôa Nguyễn Văn Cát a thôn Phú Kim, cheăm Phù Cát nếo roê hrĭng to gât vâ lêm. Pôa Cát ăm ‘nâi tiah kố, tơdroăng ki kal má môi rôh kố cho tơmeăm châ tê roê teăm tơdrêng ăm vâi krâ kuăn pơlê vâ rĕng ‘mêng rơnêu dêi hngêi trăng drêng hbrâ vâ mot tung rơnó mê hngê.

“Á hlo yă tê mâu tơmeăm ôh tá kơnâ to lâi ôh. Ki kơnía akố cho tíu tê vâi hiăng ai hlâu tơmeăm ki pin vâ roê, mê vâi krâ kuăn pơlê kal mê châ roê tơdrêng hlối vâ roê lêm kuâ hngêi, ôh tá êa tơkôm”.

A mâu tíu tê tơmeăm, kơƀeăng tơbleăng yă mâu tơmeăm châ têa a ngiâ péa, vâ kuăn pơlê ngăn ƀă pơchông. Hên tíu tê mơdró ăm ‘nâi dế klêi kơ’nâi khía mơhot plong mot cho rôh kal veăng gum mâu tơdroăng pá puât ƀă vâi, ôh tá pro mơdêk yă. Nâ Nguyễn Thị Thu Thúy, ngế ki pơkuâ tíu tê tơmeăm Sơn Quân, thôn Phú Kim tối:

“Yă tê hiăng pơkâ tơniăn sap ing nah, thăm nếo tung hngêi to lâi rơpâu to yă tê xuân ối môi tiah mê, nôkố kuăn pơlê kal vâ klâi gá ai to to gât vâi troh roê xuân tê ƀă yă ki mê, thăm nếo roê iâ mê ăm hlối ôh tá xo liăn”.

Pôa Nguyễn Ngọc Minh, ngế ki pơkuâ tíu tê gât, bêng Quy Nhơn Nam ăm ‘nâi, tung pơla măng pơlê pơla hlo ai hên tơdroăng tối tiah kố gât lêm kuâ ƀă kế ki lêm a kuâ ôh ti ai, yă tê hlối kơnâ tâk péa troh pái xôh mê ki khât a Gia Lai ăm hlo tơdroăng phá tơrôu. Mâu tíu tê a kong pơlê nôkố xuân ối ai hên mâu gât ki vâi hiăng ‘măn chôu sap ing hdrối vâ ai khía mơhot plong mot.

“Xuân ối yă ki sap nah tê ôh tá mơdêk yă, tôl ƀă loăng, cho 2 túa tơmeăm ki hlo pơhlêh hên, á ối tơmeăm ki hiăng ‘măn sap ing ton mê á tê xuân ối tiô yă ki ton ôh tá mơdêk yă”.

Vâ ví tơdroăng ki drêng hlo kuăn pơlê hliăng, mê gô̆m tơmeăm, tê yă kơnâ, khu ki ai tơdjâk tung kơchơ tê mơdró kong pơlê Gia Lai hiăng séa ngăn ƀă ăm vâ chê 400 rơpŏng ki tê tơmeăm kĭ tơhrâ pro tơniăn yă, pôi pro pơxúa ăm dêi tơná klêi kơ’nâi khía mơhot kân plong mot; hlối thăm lăm ngăn tơdjâk troh tâi tâng kơvâ cheăng vâ pro tơniăn. Ngoh Lê Đình Tân, Ngế ki séa ngăn Đô̆i Pơkuâ ngăn kơchơ mơdró kơxô̆ 4, Khu xiâm ngăn kơchơ mơdró kong pơlê Gia Lai tối:

“Mâu kŏng ti tơhrâ ƀă khu ki ai tơdjâk troh kô tê ƀă yă ki tơniăn ăm vâi krâ kuăn pơlê, khu ki ai tơdjâk troh pơla khu ki pơkuâ ngăn kơchơ ƀă kŏng an cheăm bêng tơrŭm hnê mơhno rơpŏng ki tê mơdró gum vâi krâ kuăn pơlê, tê roê môi tiah lâi ăm tơtro vâ tơkâ luâ hneăng ki xơpá kố”.

Tơdroăng ki mâu khu mơdró, rơpŏng tê mơdró a kong pơlê Gia Lai hbrâ rơnáu pro tơniăn yă, rơtế ƀă tơdroăng ki veăng gum teăm tơdrêng dêi khu ki ai tơdjâk, hiăng gum kuăn pơlê rĕng ‘mêng rơnêu dêi hngêi trăng, tơniăn tung tơdroăng rêh ối klêi kơ’nâi khía mơhot kân roh má 13 plong mot.