Peăng xêi lơ 10/3, a Gia Lai, Khu pêi hnoăng cheăng dêi Khâu xiâm ngăn ‘na tơmeăm khoăng, kong kế, têa tơnêi hiăng ai roh pôu pêi cheăng ƀă mâu Vi ƀan hnê ngăn mâu kong pơlê kơpong Tây Nguyên ƀă 2 to kong pơlê Ninh Thuận prế Bình Thuận ‘na tơmâng xo rơkong kuăn pơlê veăng hnê tối vâ ‘mâi rơnêu Luât tơnêi tíu.

A chôu phut hôp mê, mâu kăn tối, kơpong Tây Nguyên ga ai xêh hnoăng ki phá krê, maluâ cho mâu tơdroăng roh ton nah, tơdroăng ki kuăn pơlê ing tíu ê troh rêh ối akố, cho kơpong ki ai kơdrâm hdroâng kuăn ngo, tơnêi kong xuân kân rơdâ ƀă hên hĕng mâu tơdroăng ki ê. Xua ti mê, a mâu tíu ki ‘nâi athế pơkâ i nhên ƀă ôh tá phá tơ-ê ƀă luât hiăng pơkâ hdrối mê. Ki rơhêng vâ tối, cho pơkuâ ngăn tơnêi pêi chiâik deăng, tơnêi pêt kong, troăng hơlâ xing xoăng tơnêi ăm kuăn pơlê hdroâng kuăn ngo, tơdroăng pơkâ yă tơnêi tơtro ƀă tơdroăng mơdró.

Xông tơpui a roh hôp mê, pôa Lê Minh Ngân, Ngế xiâm phŏ ngăn ‘na tơmeăm khoăng, kong kế, têa tơnêi hiăng mơ’no túa ki troh tơmâng xo rơkong veăng hnê tối dêi kuăn pơlê ‘na veăng mơjiâng Luât tơnêi tíu. Hên tơring hiăng pơkâ pêi pro tơdroăng kố troh a mâu cheăm.

Tiô pôa Lê Minh Ngân tối, Khu xiâm ngăn ‘na tơmeăm khoăng, hyôh kong prâi, têa tơnêi tối, kô rĕng tối pơtâng tơdroăng ki kuăn pơlê veăng hnê mơjiâng luât troh râ kơpêng, maluâ pơtroh ăm Khu xiâm ngăn ‘na Vi ƀan ngăn ‘na pêi cheăng kâ, Vi ƀan hnê ngăn ‘na luât dêi Kuô̆k hô̆i ‘na pơtối rak vế, pêi pro tro tiô tơdroăng pâ thế dêi kuăn pơlê vâ pơtroh ăm kơ koan ki chêh xo tối tŭm têk ‘na tơdroăng ‘mâi rơnêu ‘na Luât tơnêi tíu.