Khía Kalmaegi cho khía kân má môi plong mot a kong pơlê tung chât hơnăm hdrối, pro tơ’nhiê hên tơmeăm. Kơnôm ‘nâi hbrâ  ví  xía vâ “ing hdrối, ing hơngế”, kong pơlê hiăng djâ tơniăn ăm lối 300.000 ngế kuăn pơlê lăm ối tíu ê, tŏng kum lối 200 ngế lo ing kơpong rơ iêu, kơdroh ki lup hên tơmeăm ƀă hlâ mơngế. Klêi khía kân têa, lâp tung kong pơlê ai lối 50.000 toăng hngêi tơ’nhiê, tung mê ai vâ chê 1.000 toăng hngêi tơhnâp tâi tâng; 2 ngế hlâ, 8 ngế tro rong. Tâi tâng ki lup riên châ lối 5.200 rơtal liăn. hên tơmeăm khoăng, malối a pơlê kong kơdrâm Quy Nhơn- Tíu xiâm cheăng kâ, ôm hyô dêi kong pơlê- tro tơ’nhiê ó.

 Kăn xiâm hnê ngăn Vi ƀan kuăn pơlê kong pơlê Gia Lai kơbông krếo tâi tâng mâu ki cheăng kal kí, khu mơdró  ƀă kuăn pơlê pơtối rak tuăn ‘nâi mơ-eăm, rơtế ƀă dêi rơpó ‘mâi rơnêu mâu tơmeăm hiăng tơ’nhiê, kơjo kum kuăn pơlê, ôh tá  lôi ngế ki lâi pá rŏng.