Pơlê Đê Kjiêng, cheăm A Yun, tơring ‘Mang Yang châ pơcháu pơkuâ 30 ha kong ing Kơdrum kong Tơnêi têa Kon Ka King. Kong tô khăng khoăng ton hâi pro tơ’lêi chếo kong rế tơ’lêi chếo rêm hâi. Vâ hbrâ mơdât on chếo kâ kong, droh rơtăm a pơlê Đê Kjiêng hiăng xing xoăng dêi pó lăm séa ngăn kong đi đo, pơkâ tơdroăng pêi cheăng cho chôu hlá pê.

Ngoh Măng, châ pơcháu gâk ngăn kong a pơlê tối ăm ‘nâi:

‘’Kăn ƀô̆ dêi kơdrum xuân pơtâng tối ăm vâi krâ kuăn pơlê gâk ngăn kong, vâi krâ kuăn pơlê thế gâk ngăn ƀă pêi tiô pơkâ, tâng ai tơdroăng klâi thế tối tơbleăng a tíu gâk ngăn, a kơdrum vâ gâk ngăn kong ăm ngiât, lĕm vâ la ngiâ ai pêi lo liăn ing kong’’.

Kơdrum ilâng kong tơnêi têa Kon Ka King ai lối 41.000 ha kong, kân rơdâ tung pái tơring cho tơring Đăk Đoa, ‘Mang Yang ƀă Kƀang. Pôa Lê Văn Vinh, Kăn phŏ pơkuâ Kơdrum Tơnêi têa Kon Ka King tối ăm ‘nâi, sap ing apoăng rơnó tô, tíu cheăng hiăng xing xoăng kăn ƀô̆, mơngế đi đo séa ngăn, ối tung tơring vâ ‘nâi, hbrâ mơjiâng troăng pêi 4 tơdrêng, tơdrêng amê mơjiâng mâu tôh, đô̆i hbrâ mơdât on chếo kong.

Tung mê, ai môi iâ ivá kân cho dêi vâi krâ kuăn pơlê tung tơdroăng kum tíu cheăng gô̆m xôm ƀă chôu hlá pê tơtro vâ hbrâ mơdât on chếo kong.

‘’Tíu cheăng tơkŭm po pơtâng tối ƀă vâi krâ kuăn pơlê a thôn pơlê tíu mâu rơpŏng kuăn pơlê pêi chiâk deăng a chê kong, tơkăng kong chôu chiâk deăng vâ pêi chiâk mê thế ai tối tơbleăng vâ tíu cheăng ‘nâi vâ tơbleăng ăm khu râ kăn pơkuâ xuân môi tiah khu gâk ngăn kong. Tíu cheăng xuân xúa mâu troăng hbrâ mơdât chếo kong môi tiah kơdroh hlá pê, xúa kơƀeăng pơtâng tối tâp a mâu troăng prôk mot tung kong.

Pakĭng mê gâk pêi cheăng hbrâ mơdât chếo kong, tơrŭm ƀă cheăm ƀă mâu khu pơkuâ gâk ngăn kong tơkăng kong thăm pơkuâ gâk ngăn kong’’.

Tung kơxô̆ lối 60.000 ha kong a ‘Mang Yang, ai vâ chê 10.000 ha châ mơnhên tơ’lêi chếo râ ó, tơkŭm a mâu cheăm: A Yun, H’Ra, Đê Ar, Đăk Trôi, Đăk DJăng. Tiô pôa Nguyễn Công Ngọc, Kăn phŏ pơkuâ gâk ngăn kong tơring ‘Mang Yang tối vâ hbrâ mơdât on chếo kong, tơring ‘Mang Yang hiăng pêi pro tŭm tâi tâng Khu pơkuâ hnê mơhno mơdât on chếo kong râ cheăm, mơjiâng troăng pêi 4 tơdrêng, tơdrêng amê mơjiâng mâu tôh, khu hbrâ mơdât chếo kong ƀă khu pêi cheăng tâk troh hrĭng ngế, ki xiâm cho kuăn pơlê a pơlê vâ hbrâ mơdât on chếo ing apoăng.

‘’Mot a rơnó khăng khoăng tơdroăng hbrâ mơdât on chếo cho tơdroăng pêi đi đo dêi tíu cheăng, tơdroăng pơtâng tối tíu cheăng cho pêi pro apoăng má môi, đi đo mơhnhôk, pơchân tối mâu khu pơkuâ, mâu tíu cheăng pơkuâ gâk ngăn kong, Vi ƀan cheăm ai kong mơdêk hnoăng cheăng tung tơdroăng pơtâng tối troh mâu rơpŏng kuăn pơlê rêh ối a chê kong.

Khu gak ngăn kong ai khu pêi cheăng kih thuât ai séa ngăn tung kơmăi vâ tối tơbleăng rĕng tâng on chếo drêng châ hlo on chếo mê tối tơbleăng teăm tơdrêng ăm tíu pơkuâ kong ƀă Vi ƀan mâu cheăm ai kong teăm tơdrêng vâ tơpâ on chếo, ôh tá ăm chếo rơdâ’’