Kơmăng hâi lơ 23/3, Khu xiâm Đoân tơrŭm ƀă Khu râng liăn tŏng kum hiâm mơno rơkê hơnăm ối nếo Việt Nam tơkŭm po leh diâp pri ăm 10 ngế hơnăm ối néo Việt Nam ki kơhnâ rơkê hơnăm 2022. 10 ngế hơnăm ối nếo Việt Nam ki kơhnâ rơkê hơnăm 2022 cho mâu ngế ki ai ivá rơkê, tơdroăng cheăng pêi pro tŏng kum kân ăm pơlê pơla kơnôm ing mâu tơdroăng ki mơ-eăm dêi tơná ƀă mâu tơdroăng ki kơhnâ rơkê.

Cho mâu tơdroăng môi tiah: Tiê̆n sih Trương Thanh Tùng, Hngêi trung Đăi hok Phenka, Hà Nội ƀă hên tơdroăng ki hriăn plĕng ‘na khoa hok; Trung ŭi Dương Hải Anh kăn pơkuâ Đoân Droh rơtăm Kŏng an kong pơlê Sơn La, ƀă tơdroăng ki tŏng kum hnoăng tơdjêp hên khu ki ai hiâm mơno hơ-ui tơdjuôm ivá tŏng kum vâi hdrêng kơpong kong ngo; kih sư Nguyễn Văn Thiên Vũ hiăng bro tơƀai ki ôh tá ai ngế vê, xúa kơmăi kơmok kố tung pêi chiâk; ngế hơnăm ối nếo Hà Myo cho môi ngê̆ sih iâ hơnăm hơ’lêh nếo, tơmiât rơkê ăm tơdroăng hơdruê ki kơnía môi tiah hơdruê Xẩm, hơdrê Xoan.