Mâu ƀai chêh xuân tối mâu hnoăng veăng ‘no ki kân dêi pôa Nguyễn Phú Trọng - Kăn xiâm pơkuâ hnê ngăn Đảng tung rôh mơjiâng tơnêi têa, hbrâ mơdât kâ lơluâ ƀă troăng rơhlâ tơpui kâ tung plâ pro kăn dêi Việt Nam tung tơdroăng cheăng lâp plâi tơnêi. Thŏng tấn xah dêi Lếo, Hlá tơbeăng Viêng Chăn ƀă ai hên hlá tơbeăng kân ki ê dêi Lếo xuân chêh tơbleăng um, ƀai chêh tối ‘na mâu kăn xiâm dêi Đảng, Tơnêi têa Lếo,  Kăn xiâm pơkuâ hnê ngăn Đảng, Kăn xiâm hnê ngăn tơnêi têa; pôa Thongloun Sisoulith pơkuâ djâ khu kăn xiâm lăm pôu ngăn pôa Nguyễn Phú Trọng - Kăn xiâm pơkuâ hnê ngăn Đảng.

Tung tơdroăng chêh tối a leh ‘mé pôa Nguyễn Phú Trọng - Kăn xiâm pơkuâ hnê ngăn Đảng, Khu chêh hlá tơbeăng Khmer dêi kong têa Kul (Khmer Times) mơnhên, pôa Nguyễn Phú Trọng - Kăn xiâm pơkuâ hnê ngăn Đảng châ tơdah tơdroăng ki nhuô̆m mơnê kân khât dêi kuăn pơlê Việt Nam ƀă mâu kong têa lâp plâi tơnêi kơnôm mâu tơkêa môi tuăn ƀă tơdroăng mơnhông dêi tơnêi têa ƀă hnoăng kân kĭn tung mâu tơdroăng mơ-eăm thăm mơdêk tơrŭm cheăng lâp plâi tơnêi.

Sputnik dêi Rusi xuân tơbleăng mâu ƀai chêh, tối nhên, “Pôa Nguyễn Phú Trọng, Kăn xiâm pơkuâ hnê ngăn Đảng hiăng pro xiâm kối krá tơniăn ăm tơrŭm cheăng Việt Nam – Rusi’’. “Ing Cuba, rơkong pâ mơnê pơtroh pôa Nguyễn Phú Trọng - Kăn xiâm pơkuâ hnê ngăn Đảng’’,  cho tơdroăng pơxá ƀai chêh châ tơbleăng tung trang má môi hlá tơbeăng Granma dêi Cuba. Ƀai chêh hiăng chêh tối mâu tơdroăng veăng gum kân dêi pôa Nguyễn Phú Trọng - Kăn xiâm pơkuâ hnê ngăn Đảng ăm tơdroăng mơnhông mơdêk dêi tơnêi têa ƀă kuăn pơlê Việt Nam, xuân cho “tơrŭm cheăng, tơrŭm môi tuăn, cho nhŏng o” rế hía rế krá tơniăn pơla kuăn pơlê, Đảng Kŏng san ƀă Chin phuh 2 tơnêi têa. Khu chêh hlá tơbeăng Reuters dêi kong têa Ăng-glê hiăng chêh tối nhên ‘na leh ‘mé pôa Nguyễn Phú Trọng - Kăn xiâm pơkuâ hnê ngăn Đảng, ƀă tơdroăng ki veăng dêi hên khu tơpui kâ ƀă kong têa ê, teăng mâ mâu khu tơrŭm cheăng ƀă pú hmâ lâp plâi tơnêi.