Pôa Nguyễn Phú Nghĩ, Kăn phŏ hnê ngăn Vi ƀan Măt trâ̆n Tơnêi têa Việt Nam kong pơlê Dak Nông tối nhên, Hneăng hôp rôh má 5 hiăng mơ’no hên troăng hơlâ, pro tiah lâi vâ Măt trâ̆n Tơnêi têa Việt Nam rêm râ tung kong pơlê mơdêk hnoăng cheăng, malối cho tung hnoăng cheăng séa ngăn ƀă tối tơbleăng tung pơlê pơla. Hneăng hôp hiăng tơkêa pơtroh 69 Ngế cheăng tung Vi ƀan Măt trâ̆n Tơnêi têa Việt Nam kong pơlê Dak Nông hneăng 5 pơla hơnăm 2024-2029.

A rôh hôp má môi, mâu ngế cheăng hiăng tơkêa pơtroh jâ Hà Thị Hạnh, Ngế cheăng tung khu pơkuâ ngăn Đảng, Ngế xiâm pơkuâ Khu hnê mơhnhôk pro kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Nông hneăng nếo. Hneăng hôp xuân tơkêa pơtroh khu kăn ki veăng hôp a Hneăng hôp khu kăn lâp tơnêi têa Măt trâ̆n Tơnêi têa Việt Nam rôh má 10 mê ai 6 ngế kăn ki păng ‘nâng, 2 ngế ki hbrâ.