Kơxo lơ 13/12, a Hà Nội, po hneăng hôp mâu kăn tung lâp tơnêi têa Khu mâu ki plôm mâ Việt Nam rôh má 10 , hneăng hơnăm 2022-2027. 5 hơnăm hdrối, mơhé trâm hên xơpá xua COVID-19 la mâu tơdroăng cheăng pêi dêi Khu plôm mâ  Việt Nam xuân pêi châ tiô pơkâ, pơtối rak hnoăng cho hngêi tơdjuôm dêi lối 74 rơpâu ngê tung khu.

Hneăng hơnăm 2022-2027, khu mơngế plôm mâ Việt Nam pơtối mơdêk hnoăng cheăng séa ngăn, tối ăm Đảng, Tơnêi têa ‘na mâu luât pơkâ ki tơdjâk troh mâu ngế plôm mâ, po rơdâ mâu túa pêi cheăng, tăng cheăng pêi tơniăn, mơdêk tơ ƀrê tơdroăng rêh ối ăm mơngế ki plôm mâ. 

Veăng hôp ƀă tối tơbleăng a Hneăng hôp, jâ Bùi Thị Minh Hoài, Ngế pơkuâ khu hnê mơhnhô cheăng Xiâm tơnêi têa pâ thế rêm râ khu pơtối tơbleăng mâu troăng pêi, luât pơkâ dêi Đảng ƀă tơnêi têa troh ƀă mâu ngế tung Khu; tơbleăng tơdroăng cheăng hnê chư, hnê cheăng pêi, mơdêk hlê plĕng ăm mâu kăn ƀô̆ tung khu. Malối tơmâng ngăn hên tâ troh  khu tơrŭm cheăng dêi Khu a kơpong kong ngo, kơpong hngế hngo, kơtiê xơpá.