A Jakarta, Indonesia, Kăn teăng mâ cho pôa Vũ Hồ, Ngế xiâm pơkuâ ngăn SOM ASEAN Việt Nam pơkuâ djâ khu kăn Việt Nam veăng Hôp mâu kăn xiâm  ASEAN (SOM) ƀă hneăng hôp roh má 15 Khu Pêi hnoăng cheăng Hô̆i đong xing xoăng tơdroăng cheăng ASEAN (ACCWG) ‘na Timor-Leste mot tung ASEAN. Mâu hneăng hôp drêng kố vâ hbrâ ăm hneăng hôp mâu kăn xiâm ASEAN rôh má 42 ƀă mâu hneăng hôp mâu Ngế xiâm tơpui kâ kô po tung khế 5/2023 a Indonesia. A hneăng hôp SOM,  mâu kăn xiâm ASEAN hiăng tơpui tơno hên ƀă  hiăng vâ môi tuăn dêi rơpó tơbleăng mâu tơdroăng kal pêi pro dêi ASEAN tung hơnăm 2023, tá mơdêk cheăng kâ ƀă ‘mâi mơnhông, mơdêk ivá cheăng ƀă xúa tơƀrê luât ASEAN; hbrâ ví ƀă mâu pơloăng mơnúa kring vế tơniăn tơdroăng ton nah.

Tung rôh hôp má 15 Khu pêi hnoăng cheăng Hô̆i xing xoăng tơdroăng cheăng pêi ASEAN ‘na Timor Leste pâ mot tung ASEAN, mâu kong têa vâ môi tuăn pơtối kơjo kum Timor Leste mơdêk ivá cheăng, chôa lâng pêi pro tiô pơkâ dêi mâu kong têa tung khu ASEAN.