Hâi lơ 23/3, Khu tơrŭm tê mơdró ƀă Kơmăi kơmok Việt Nam tơkŭm po Hneăng hôp tơpui tơno ‘’Vêh mơnhên khu tê mơdró vâ mơnhông krá tơniăn’’. Pôa Phạm Tấn Công, Kăn xiâm hnê ngăn VCCI tối, lâp plâi tơnêi xuân môi tiah Việt Nam hiăng tơkâ hluâ mâu tơdroăng pơ’lêh sap ing ai pơreăng kân COVID-19 hiăng pro pá puât tung mơjiâng tơmeăm khoăng tê mơdró ƀă tơdroăng pêt mơjiâng tơmeăm, pơtroh tơmeăm ƀă xúa tơmeăm lâp plâi tơnêi.

Mâu pơkâ kố dế pơkâ khu tê mơdró thế vêh mơnhên môi tiah lâi vâ rêh ƀă mơnhông mơdêk. A hneăng hôp tơpui tơno, mâu ki rơkê hiăng mơnhên mâu tơdroăng ki xiâm tơdjâk troh tơtêk cheăng kâ ƀă tơdroăng mơjiâng pro tơmeăm tê mơdró dêi khu tê mơdró Việt Nam, mơnhên mâu roh tơ’lêi kal hbrâ vâ khu tê mơdró po rơdâ tíu tê mơdró ngi kong têa ê, mơhnhôk mơ’no liăn cheăng ki dâi lĕm ƀă mâu khu râ tŏng kum mơnhông mơdêk.