Peăng xêi hâi lơ 24/2, a tíu pêi cheăng dêi Chin phuh, pôa Phạm Minh Chính, Ngế pro xiâm hnê ngăn prế pôa Vương Đình Huệ, Kăn xiâm hnê ngăn Kuô̆k hô̆i hiăng pơkuâ ‘na tơrŭm cheăng pơla Khu hnê mơhno kăn ƀô̆ Đảng Chin phuh ƀă Đảng đoân dêi Kuô̆k hô̆i. A hneăng hôp mê, mâu ngế cheăng tung Đảng đoân dêi Kuô̆k hô̆i ƀă Kăn hnê mơhno cheăng Đảng Chin phuh tơpui tơno pro mơnhên mâu tơdroăng tơƀrê tung tơrŭm cheăng pơla péa pâ; ki rơhêng vâ tối, pơkâ mơ’no mâu hnoăng cheăng, troăng hơlâ, pơtâng pơtroh dêi pó mâu tơdroăng ki xah pá vâ rơtế dêi pó hlê plĕng, tơrŭm, vâ mơdêk ki tơƀrê mâu hnoăng cheăng dêi rêm pâ ƀă xua ing tơdroăng cheăng xiâm.

Mơgêi hneăng hôp, pôa Phạm Minh Chính hiăng kơdeăn khĕn tơdroăng rơtế pêi hnoăng cheăng, tơbleăng tối dêi pó tung rak vế, pêi pro hnoăng cheăng pơla Kuô̆k hô̆i ƀă Chin phuh; loi tơngah, la ngiâ ah Đảng đoân Kuô̆k hô̆i ƀă Khu xiâm hnê mơhno cheăng Đảng dêi Chin phuh kô pơtối tơrŭm cheăng krá tơniăn, pơtối hơ’lêh nếo, tơtro ƀă tơdroăng ki ai păng ‘nâng, malối tung tơdroăng ki mơjiâng luât, mâu tơdroăng ki kal kân, adrêng, ki păng ‘nâng vâ mơ’no tối, mơjiâng troăng hơlâ luât ăm tơdroăng ki mơnhông tơnêi têa.