Kơxo hâi lơ 17/3, a Hà Nội, Khu ngăn vâi kơdrâi Việt Nam tơkŭm po Hôp pơxiâm pêi cheăng tơdroăng Tơkêa bro tơdroăng tơkêa  “Kum khu pêi cheăng tơrŭm xua vâi kơdrâi veăng rak ngăn, kum tăng cheăng pêi ăm vâi kơdrâi troh hơnăm 2030” (pơxá cho tơdroăng tơkêa 01). Pôa Lê Minh Khái, cheăng tung Khu kăn hnê ngăn xiâm Đảng, Ngế pro xiâm phŏ hnê ngăn Chin phuh troh veăng hôp.

Tơdroăng tơkêa bro kơxô̆ 01 ai pơkâ: ‘Mâi mơnhông, tŏng kum, mơdêk tơƀrê ƀă tơdroăng cheăng ki iâ gá 1.500 khu pêi cheăng tơrŭm, 10 rơpâu tôh tơrŭm cheăng châ rêm râ Khu kơjo kum mơjiâng; 100% ngế kơdrâi rak ngăn dêi khu pêi cheăng tơrŭm châ hnê hriâm cheăng vâ rơkê rak ngăn, pơkuâ cheăng tơtro ƀă tơdroăng pêi pro tơmeăm, tê mơdró dêi khu pêi cheăng tơrŭm; hnê, kơjo kum mơjiâng nếo 750 khu pêi cheăng tơrŭm xúa khu vâi kơdrâi veăng rak ngăn pơkuâ kum hên cheăng pêi ăm mơngế pêi cheăng dêi vâi kơdrâi...

Tối tơbleăng a rôh hôp, pôa Lê Minh Khái, Ngế pro xiâm phŏ hnê ngăn tơnêi têa tối nhên: Khu ngăn vâi kơdrâi Việt Nam kal hbrâ tơrŭm krá ƀă mâu khu xiâm, kơvâ cheăng, kong pơlê, tơbleăng pơkâ pêi tơdroăng Tơkêa bro tiô tơrêm khế hơnăm ƀă pêi tơdroăng Tơkêa bro kơxô̆ 01 tŭm têk, tơdrêng, pêi tơƀrê ƀă hlối tơtro ƀă tơrêm tơdroăng cheăng rêh ối dêi kong pơlê.