Pơtăm hơnăm hdrối tơdroăng tơ’noăng Khu ngăn Mố đô̆i hơnăm hiăng krâ djâ troăng ahdrối kong pơlê Kon Tum tơkŭm po hơniâp ro tung lâp lu. Kăn ƀô̆, hô̆i viên mố đô̆i hơnăm hiăng krâ pleăng lối 34.200m2 tơnêi, veăng gum lối rơpâu hâi pêi cheăng rơnêu, bro nếo 200 km troăng prôk thôn pơlê, hno troăng têa tung klâng; ‘nhiê tah 500 toăng hngêi ối pơtân, bro nếo 44 toăng hngêi tơrŭm Mối hơnăm hiăng krâ; lối 800 túa bro tíu, khu pêi cheăng tơrŭm, khu mơdró kâ dêi mâu mố đô̆i hơnăm hiăng krâ tơdjâk rơdêi hiâm mơno mơ-eăm tơkâ luâ pá puât mơnhông mơdêk cheăng kâ rêh ối.

Tơpui a rôh po hneăng hôp, Thươ̆ng tươ̆ng Bế Xuân Trường, Kăn hnê ngăn Khu ngăn Mố đô̆i hơnăm hiăng krâ Việt Nam mơnhên tối khât hnoăng cheăng tơkŭm po hneăng hôp dêi Khu ngăn Mố đô̆i hơnăm hiăng krâ kong pơlê Kon Tum; tơmâng xo, khĕn kơdeăn hiâm mơno kơhnâ dêi hô̆i viên mố đô̆i hơnăm hiăng krâ tung tơdroăng ki veăng mơjiâng, rak vế Đảng, kăn pơkuâ ƀă Kuăn pơlê; tơrŭm tŏng gum dêi rơpó mnhông cheăng kâ.