Kơxo lơ 17/2, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ Hneăng hôp tơpui tơdroăng tah ki xơpá ƀă mơnhông mơdêk tê mơdró tơmeăm khoăng tơnêi tơníu hngêi trăng tơniăn, krá ton. Tơpui a rôh hôp, pôa Phạm Minh Chính, Ngế pro xiâm hnê ngăn Chin phuh ăm ‘nâi hneăng hôp tối ki khât dêi tơdroăng tê mơdró ‘na tơnêi, hngêi trăng, mâu tơdroăng pá, tơvâ tơvân; tối ‘na troăng rơhlâ, ‘na tơdroăng tơnêi tíu hngêi trăng ƀă mâu tơdroăng ki tơdjâk troh mơdêk tê mơdró ‘na tơnêi tíu hngêi trăng pơtối mơnhông tơƀrê, tơniăn, krá ton.

Ngế pro xiâm hnê ngăn tơnêi têa pơkâ thế mâu kăn tối nhên ki kal, ki khât dêi tơdroăng; tối nhên ki xiâm, malối tơdroăng ki xiâm tơngôu ôh tá rĕng tơmâng, ing mê pơkâ tơdroăng cheăng, troăng rơhlâ mơnhông tê mơdró tơnêi hngêi trăng ăm tơtro ƀă troăng rơhlâ, luât pơlât dêi Đảng, Tơnêi têa, tiô troăng cheăng kâ tê mơdró, troăng rơhla xah hô̆i chuh ngiah.

Tiô Ngế pro xiâm hnê ngăn tơnêi têa, klêi hôp me, Chin phuh kô pơkâ tơdroăng ‘na tê mơdró tơnêi hngêi trăng. Ing mê, pro xiâm vâ mơdêk tê mơdró tơnêi hngêi trăng mơnhông tơniăn, krá ton, ing tơdroăng pêi pro tơtro pơla Tơnêi têa, kuăn pơlê, khu mơdró kô châ xúa tŭm.