Khu chêh hlá tơbeăng thế rĕng tâ, ƀeăn ƀĕng tâ, tơtro tâ, rơkê tâ ƀă tro ƀă tơdroăng nôkố tâ’’. Mê cho pơkâ dêi pôa Trần Hồng Hà, Ngế pro xiâm phŏ hnê ngăn tơnêi têa a hneăng hôp tơpui tơno Khu chêh hlá tơbeăng apoăng rơnó Hơngui Quý Mão châ tơkŭm po a kơxo lơ 3/11, a Hà Nội. Tơdroăng kal kố xua Khu pơtâng hnê tối tơdroăng kal Tơnêi têa, Khu xiâm pơkuâ tơdroăng kal ƀă pơtâng hnê tối, Khu pơkâ khu chêh hlá tơbeăng Việt Nam ƀă Hlá tơbeăng Kuăn pơlê tơkŭm po.

Rơtế veăng ai mâ ƀă mâu khu râ kăn pơkuâ kơ koan chêh hlá tơbeăng, mâu khu chêh hlá tơbeăng ki hiăng ton hơnăm cheăng kăch măng ƀă kơdrâm mơngế chêh hlá tơbeăng, rah chêh hlá tơbeăng ƀă hía hé. A hneăng hôp, pôa Tống Văn Thanh, Kăn pơkuâ tơdroăng chêh hlá tơbeăng – In hlá tơbeăng, Kăn xiâm pơkuâ tơdroăng pơtâng hnê tối tơdroăng kal tơnêi têa tối ăm ‘nâi: Ngăn tơdjuôm, mâu hlá tơbeăng, tơdroăng tơpui mơ’no tung rơ’jíu, um tơvi Têt Quý Mão 2023 châ mơ’no dâi lĕm, kân krip, cho má môi ‘na tơdroăng a ngâ; trâu hơngế, hên tơdroăng, hôm păng ‘nâng ‘na tơdroăng chêh xiâm.

Mâu tơdroăng chêh ki má môi châ mâu kơ koan chêh hlá tơbeăng tơkŭm mê cho: Phiu ro Đảng, phiu ro rơnó Hơngui, phiu ro tơnêi têa krá tơniăn tơkâ hluâ pơloăng mơnúa cho tơdroăng ki eăng pro tơniăn klêi kơ’nâi pơreăng kân xông tâ tú, tơbâ pâ mơnê Pôa Hồ Chí Minh, Kăn xiâm hnê ngăn tơnêi têa kân krip; tơdroăng loi tơngah, pói vâ, tơdroăng mơ-eăm ƀă ivá ó rơdêi tơrŭm môi tuăn dêi hdroâng mơngế Việt Nam.