Klăng leh tơbâ 92 hơnăm hâi mơjiâng Đoân Droh rơtăm Kŏng san Hồ Chí Minh, kơxo lơ 17/3, Khu xiâm pơkuâ Đoân Droh rơtăm Kŏng san Hồ Chí Minh tơkŭm po hneăng hôp tơpui tơno ‘’Rơkong tơpui hơnăm ối nếo – Tơdroăng pêi dêi Đoân’’. Hneăng hôp tơpui tơno tơkŭm po tiô troăng tơdrêng hlối mơ’no tung troăng hyôh măng tơdjêp ƀă tíu hrik hyôh măng mâu kong pơlê, khu pơkuâ Đoân Droh rơtăm pơlê kong kơdrâm, đoân ối tung khu ƀă khu tơrŭm cheăng Đoân, Hô̆i a kong têa ê.

Hneăng hôp tơpui tơno ai 2 tơdroăng: Tơdroăng ki má môi dó inâi ‘’Mơnhông mơdêk ivá hơnăm ối nếo mơjiâng tơniăn tơnêi têa mơnhông mơdêk tŭm tơdroăng, hơniâp lĕm” tơpui tơno ‘na mâu troăng mơdêk ki dâi lĕm, châ tơƀrê tung hnê hriâm; mâu tơdroăng pêi cheăng kăch măng; tơkŭm po mơjiang Đoân – Đoân ki veăng mơjiâng Đảng; po rơdâ rŭm môi tuăn hlối tơkŭm droh rơtăm ƀă mơnhông mơdêk hiâm mơno pleăng hnoăng cheăng, djâ troăng ahdrối, tơrŭm môi tuăn, rơkê, khên tơnôu dêi rơxông ối nếo kum mơjiâng tơnêi têa mơdêk tŭm tơdroăng, hơniâp lĕm  tiô tơdroăng Hneăng hôp Đảng lâp tơnêi têa roh má 13.

Tơdroăng ki má péa ƀă tơdroăng ki xiâm cho tơpui tơno mâu troăng pêi dêi khu tơrŭm cheăng Đoân hô̆i, Đô̆i tung tơdroăng rak ngăn, tŏng kum droh rơtăm phô̆m xông kân, mơnhông mơdêk tŭm túa.