Học viện Chính trị Quốc gia Hồ Chí Minh nếo tơrŭm ƀă Đăi hok Thái Nguyên tơkŭm po rôh hôp “Hnoăng cheăng dêi khu tơrŭm Đoân tung mơdêk ki rơkê plĕng tung hnoăng cheăng ‘mot đảng viên ăm mâu sinh viên nôkố”. A rôh hôp, mâu kăn hiăng tơpui tơno túa tơmiât ‘na ‘mot đảng viên ƀă mâu tơdroăng ki rơkê plĕng ‘na mơnhông Đảng a mâu Đảng ƀô̆ hngêi trung tung sinh viên; Hnoăng cheăng dêi Đoân Droh rơtăm veăng mơjiâng Đảng ƀă khu pơkuâ tơdroăng kal kí krúa lĕm, rơdêi a hngêi trung đăi hok.

Mâu ngế ki veăng tơpui tối a rôh hôp mê pơrá tối nhên đăi hok cho tíu ki hnê hriâm, rơnêu pât, hnê mâu ngế ki rơkê ăm tơnêi têa, cho tíu ki mơjiâng hiâm mơno, túa rêh ối lĕm tro dêi sinh viên, kăn ƀô̆ rak ngăn tung la ngiâ. Xua mê, mơjiâng ƀă mơnhông Đảng ƀă sinh viên tung hngêi trung đăi hok cho tơdroăng pêi ki kal tung hnoăng cheăng hnê hriâm, hnê tơ’nôm, hriâm pât ăm sinh viên, ăm tơdroăng ki mơnhông krá tơniăn dêi tơnêi têa.