Kơxo hâi lơ 6/3, a pơlê kong xiâm Vientiane, Kăn xiâm hnê ngăn Hô̆i đong Kuăn ngo Kuô̆k hô̆i Việt Nam - pôa Y Thanh Niê Kdăm ai rôh pêi cheăng ƀă Kăn xiâm hnê ngăn Vi ƀan Kuăn ngo Kuô̆k hô̆i Lếo Khamchan Sotapasuerd vâ pơtối rak vế tơrŭm cheăng, mơdêk tơrŭm pơla péa kơ koan dêi Kuô̆k hô̆i péa tơnêi têa. A rôh  pêi cheăng, péa pâ xuân hiăng rơtế ƀă dêi rơpó tơpui tơno ‘na tơdroăng tơrŭm cheăng pơla péa tơnêi têa, péa Kuô̆k hô̆i tung hơnăm hdrối. Mơgêi hâi pêi cheăng, péa pâ rơtế ƀă dêi rơpó kĭ tơhrâ tơrŭm cheăng pơla Hô̆i đong Kuăn ngo Kuô̆k hô̆i Việt Nam ƀă Vi ƀan Kuăn ngo Kuô̆k hô̆i Lếo.

Tung mê, môi tuăn pơtối tơrŭm krá, mơdêk tơpui tơno tối ăm dêi rơpó ‘nâi mâu tơdroăng, túa pêi cheăng ki tơdjâk troh hnoăng cheăng pêi dêi rêm pâ; tối ăm dêi  rơpó ‘nâi mâu tơdroăng hiăng klêi séa ngăn, tí tăng ngăn, pêi pro tiô luât pơkâ tŏng kum, pơkâ mâu tơdroăng tơkêa bro mơnhông cheăng kâ - rêh ối kơpong hdroâng kuăn ngo, kong ngo; tơrŭm tơkŭm po mâu hneăng hôp kân, hôp tơpui tơno ‘na tơdroăng kal.